რომ არა პაპარაცები, ბევრ რამეს ალბათ ვერც ვნახავდით და ვერც გავიგებდით. აბეზარა ფოტოგრაფები ვარსკვლავებს, როგორც წესი, აღიზიანებენ, თუმცა, ამ შემთხვევაში ინგლისელმა მომღერალმა, დუა ლიპამ, თავად მოახერხა პაპარაცის განაწყენება, თანაც ისე, რომ ამ უკანასკნელმა პირდაპირ სასამართლოს მიმართა.

ლიპას პაპარაციმ საკუთარი ფოტოს ინსტაგრამზე განთავსებისთვის უჩივლა. აშშ-ის სასამართლოს ჩანაწერების მიხედვით, პოპვარსკვლავი 2019 წლის თებერვალში, აეროპორტის რიგში გადაიღეს, ოთხი დღის შემდეგ კი მან ეს ფოტო "ნებართვისა და თანხმობის მიღების გარეშე" გაუზიარა თავის გამომწერებს.

მომჩივანი კომპანიის, Integral Images-ის განცხადებით, ლიპამ ფოტო "შეგნებულად" გამოაქვეყნა და მისით სარგებელიც ნახა, რადგან ინსტაგრამი მუსიკოსებისათვის ერთ-ერთი მარკეტინგული იარაღია. ამის გათვალისწინებით, კომპანია ზარალის ანაზღაურებას $150 ათასით ითხოვს. სასამართლოს ჩანაწერებით ისიც ირკვევა, რომ მომღერალს საკუთარ ინსტაგრამზე მონეტიზაციის ფუნქცია აქვს ჩართული, რომლის საშუალებითაც გამომწერების რიცხვის გაზრდა და რეკლამების ან ბმულების საშუალებით მუსიკის შესაძენად მათი გადამისამართებაა შესაძლებელი.

მიუხედავად იმისა, რომ ბევრს მიაჩნია, თუკი ფოტოზე თავადაა გამოსახული, მისი გამოყენების უფლებაც აქვს, სამართალი ასე არ განსაზღვრავს და საავტორო უფლებას ფოტოზე მის გადამღებს ანიჭებს. ასეთი შეცდომა ლიპას გარდა არაერთ ცნობილ ადამიანს მოსვლია, მათ შორის, ჯიჯი ჰადიდს, ლიამ ჰემსვორტს, ქლოი კარდაშიანს, არიანა გრანდესა და ჯასტინ ბიბერს.