შინაგან საქმეთა მინისტრის განცხადებით, პარლამენტში მივა, თუ ჯანმთელობა არ შეუშლის ხელს. მისი თქმით, პარლამენტში მისვლა უკეთესიც კია, რადგან უკეთ აუხსნის დეპუტატებს, თუ რა მოხდა 5-6 ივლისს.

"პარლამენტში, რა თქმა უნდა, გუშინაც არ მაცადეს საუბარი და ახსნა. ვალდებული ვარ, როცა პროცედურები ჩაინიშნება და დამიბარებენ, მივიდე და რა თქმა უნდა, ჯანმრთელობა თუ არ შემიშლის ხელს აუცილებლად მივალ და არაერთხელ მივსულვარ და არანაირი პრობლემა არ არის. პირიქით, ძალიან კარგი იქნება რომ ზუსტად ავუხსნა, თუ რა მოხდა და როგორ მოხდა", — განაცხადა მან.

გომელაურის თქმით, არ ელოდნენ, რომ მოვლენები ასე განვითარდებოდა და ჟურნალისტებზე მასიურად იძალადებდნ. მისი თქმით, არასწორია რომ პოლიციამ ჟურანლისტები არ დაიცვა და უფრო სწორია, ვერ დაიცვა.

"დავაკავეთ რამდენი ადამიანი უკვე. არა ერთი და ორი, 15-16 ადამიანი დაკავებულია. კიდევ ვაპირებთ, ვსწავლობთ, ზღვა მასალაა მერწმუნეთ, ძალიან ბევრია ეს ვიდეოები და ჩანაწერები. მინდა რომ ვთხოვო ყველა ჟურნალისტებს, ოპერატორებს, რომ გვემუშაონ უფრო აქტიურა", — განაცხადა მან.

მანვე აღნიშნა, რომ ვერ იტყვის გამოძიება ჯგუფურად ძალადობაზე დაიწყება თუ არა. მისივე თქმით, ყველა საგამოძიებო მოქმედებების დაწყებას პროკურატურასთან ათანხმებენ და თუ ეს მუხლი გამოიკვეთება, გამოძიება დაიწყება.

გარდა ამისა, გომელაური ამტკიცებს, რომ 5 ივლისს სპეცდანიშნულების რაზმები გამოყვანილი იყო და ყველგან იყვნენ განაწილებული. მისი თქმით, საზოგადოებას მაინცდამიანც რობოკოპი არ უნდა ეგონოს სპეცრაზმი. მისი თქმით, ამ ეკიპირებას მაშინ იცვამენ, როცა "უნდა გაწმინდონ ჯგუფი", "როცა იყენებენ წყლის ჭავლს, გაზს და მასასთან სამუშაო თემაა და არა 10 კაცს გამოეკიდოს 5 როპოკოპად ჩაცმული პოლიციელი".

გომელაურის პარლამენტში დაბარება ჯერ პრაიდის კვირეულის დაწყებამდე მოითხოვა ფრაქცია შარლ მიშელის რეფორმების ჯგუფმა. 5-6 ივლისს განვითარებული მოვლენების შემდეგ კი ოპოზიციის მხრიდან არაერთი განცხადება გაკეთდა, შს მინისტრის პარლამენტში დაბარების აუცილებლობაზე. პარლამენტის თავმჯდომარემ კი ამის შესახებ განცხადება ბიუროს სხდომაზე გააკეთა. თუმცა, ჯეჯრჯერობით არ არის დადასტურებული, გომელაური მივა თუ არა პარლამენტში და როდის.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.