"პოლიცია იყო ადეკვატური რაოდენობის და ეფექტურად მოქმედებდა", — ასე აფასებს ქართული ოცნების ლიდერი შალვა პაპუაშვილი 5 ივლისის მოვლენებს, როცა ძალადობრივმა ჯგუფებმა 50-ზე მეტ ჟურნალისტსა და მოქალაქეზე იძალადეს, რაც პოლიციამ ვერ აღკვეთა. უმრავლესობის სხდომის დასრულების შემდეგ მან ჟურნალისტებთან განაცხადა, რომ ეს იყო ტრადიციული სხდომა, სადაც სხვადასხვა საკითხზე იმსჯელეს და მათ შორის, ბოლო მოვლენები და შს მინისტრის პარლამენტში მისვლა იყო.

პაპუაშვილი აღნიშნავს, რომ უმრავლესობა ბოლო დღეებში განვითარებულ მოვლენებს დეტალურად სწავლობს პირველი ივლისიდან დაწყებული დღემდე და იმედოვნებს, რომ ყველა მოძალადე სათანადოდ დაისჯება. ამასთან, როგორც მან აღნიშნა, შს მინისტრს მიეცემა შესაძლებლობა, ამ საკითხებზე განმარტებები პარლამენტის ტრიბუნიდანაც გააკეთოს.

„შინაგან საქმეთა სამინისტრომ გუშინ გააკეთა ვრცელი და დეტალური განმარტება, მათ შორის, 5 ივლისზე. ვფიქრობ, ვრცელი და ამომწურავი ინფორმაცია მივიღეთ, თუმცა, ამის მიუხედავად უმრავლესობა მსჯელობს, რომ შინაგან საქმეთა მინისტრი მოიწვიოს პარლამენტში, რათა მას მიეცეს შესაძლებლობა პარლამენტის ტრიბუნიდანაც გააკეთოს განმარტებები“, — განაცხადა მან.

გარდა ამისა, პაპუაშვილის თქმით, ასევე ისაუბრეს უზენაესი სასამართლოს მოსამართლეობის კანდიდატების დანიშვნის, ადგილობრივი არჩევნების, პარლამენტის მოსალოდნელი რიგგარეშე სხდომების საკითხებზე.

გომელაურის პარლამენტში დაბარება ჯერ პრაიდის კვირეულის დაწყებამდე მოითხოვა ფრაქცია შარლ მიშელის რეფორმების ჯგუფმა. 5-6 ივლისს განვითარებული მოვლენების შემდეგ კი ოპოზიციის მხრიდან არაერთი განცხადება გაკეთდა, შს მინისტრის პარლამენტში დაბარების აუცილებლობაზე. პარლამენტის თავმჯდომარემ კი ამის შესახებ განცხადება ბიუროს სხდომაზე გააკეთა. თუმცა, ჯეჯრჯერობით არ არის დადასტურებული, გომელაური მივა თუ არა პარლამენტში და როდის.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შუეშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგაოდებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.