როგორც BBC იუწყება, შესაძლოა, რუსეთის მთავრობამ კინოთეატრებში დისნეის ახალი ფილმის Beauty and the Beast-ის ჩვენება აკრძალოს, ამის მიზეზი კი ეგრეთწოდებული "გეი პროპაგანდის" ამკრძალავი კანონია, რომელიც რუსეთში მოქმედებს.

რუსეთის კულტურის მინისტრმა ვლადიმერ მედინსკიმ ჯერ არ ნანახი ფილმის შესახებ თქვა, რომ პრემიერამდე ფილმს აუცილებლად ნახავენ და იმ შემთხვევაში, თუ ის "სამარცხვინო გეი და ცოდვილი სიუჟეტით" იქნება გაჯერებული ის აუცილებლად აიკრძალება.

დუმის დეპუტატმა ვიტალი მილინოვმა კი თქვა, რომ ფილმი "გეი პროპაგანდის" გამო არამხოლოდ რუსეთში არამედ ყველგან უნდა აიკრძალოს.

როგორც მოგეხსენებათ, ლამაზმანი და ურჩხული დისნეის ისტორიაში იქნება პირველი ფილმი, რომელშიც ღიად გეი პერსონაჟს ვიხილავთ საკუთარი სასიყვარულო ისტორიით.

"ლეფოი არის პერსონაჟი, რომელიც ერთ დღეს ოცნებობს, რომ იყოს გასტონი, მეორე დღეს კი სურს, მას აკოცოს. ის დაბნეულია, მაგრამ დროთა განმავლობაში საკუთარ გრძნობებში ერკვევა. ძალიან მაგარია, რომ დისნეის ფილმში გეი პერსონაჟი შემოდის", - ამბობს ფილმის რეჟისორი.

Beauty and the Beast ეკრანებზე 17 მარტს გამოდის.