ქართული ოცნების დეპუტატი, ნინო წილოსანი, პრაიდის კვირეულთან დაკავშირებით აცხადებს, რომ ნებისმიერ ადამიანს გამოხატვის თავისუფლება აქვს და მათი გადასაწყვეტია რამდენად დააორგანიზებენ ისინი მსვლელობას. On.ge-სთან საუბრისას ის აღნიშნავს, რომ ნებისმიერი გამოხატვის ფარგლებში სახელმწიფოს ექნება კანონის და კონსტიტუციის დაცვის ვალდებულება.

"მმართველი პარტიის ინიცირებულია ის განახლებული კონსტიტუცია, რომელშიც კიდევ უფრო მკაფიოდ არის ჩაწერილი ადამიანის გამოხატვის თავისუფლება. რა თქმა უნდა, კონსტიტუციის და მთლიანი სულისკვეთების ფარგლებში, შემიძლია, თამამად ვთქვა, რომ ნებისმიერ ადამიანს აქვს გამოხატვის თავისუფლება, მათ შორის, პრაიდის მარშთან დაკავშირებით, ეს მათივე გადასაწყვეტია რამდენად ისინი დააორგანიზებენ ამ მსვლელობას, ამ პროცესს", — ამბობს ის.

მისი თქმით, მმართველი პარტიის თავმჯდომარის, ირაკლი კობახიძის განცხადება პრაიდთან დაკავშირებით არასწორად ინტერპრეტირებული იქნა.

"რაც თავად ირაკლი კობახიძემ განაცხადა, ამის გარკვეულწილად, შეიძლება, არასწორი გაგება და ინტერპრეტაცია მოხდა. ის გულისხმობდა, რომ მათ თავად არ უნდა მიიღონ ეს გადაწყვეტილება, რაც გულისხმობს იმას, რომ ამგვარი მარში კიდევ ერთ რაღაც დაპირისპირებას გამოიწვევდაო. აქედან გამომდინარე, რა თქმა უნდა, თითოეული მხარე თვითონ მიიღებს გადაწყვეტილებას, რა ფორმით გამოხატოს თავისი მიმდინარეობა თუ მიმართულება", — განაცხადა მან.

• თუ რომელიმე ჯგუფის აქტივობის მიზანი პროვოკაციულია, ასეთი ქმედებისგან თავი ყველამ უნდა შეიკავოს — მდინარაძე პრაიდზე
• ერთი ხელით არ უნდა გასცე ნებართვა და მეორე ხელით არ უნდა უთხრა, ნუ ჩაატარებო — ხაზარაძე პრაიდზე
• მჯერა, რომ პოლიცია შეძლებს წესრიგის უზრუნველყოფას — ხვიჩია ღირსების მარშზე
• კარგი იქნება გაითვალისწინონ, რატომაა საზოგადოების დიდი ნაწილის მხრიდან აგრესია — მიქანაძე პრაიდზე
• თუ გრძნობ, რომ შეიძლება დაპირისპირება მოხდეს, მორალური ვალდებულება აქვთ, თავი შეიკავონ — მაჭარაშვილი პრაიდზე
• ნებისმიერი აქცია სახელმწიფოს მიერ დაცული უნდა იყოს ძალადობისგან — მეგრელიშვილი პრაიდზე
• იმის გათვალისწინებით, რა მოქმედებებიც უძღვის ხოლმე, მიზანშეწონილი არ იქნება, ჩატარდეს — ღუდუშაური პრაიდზე
• პაპუაშვილი პრაიდზე: თუ მათ რაიმე ქმედება სურთ, სურთ, მაგრამ ამავე დროს, ყველას აქვს უფლება, საკუთარი შეფასება ჰქონდეს
• მე თუ მკითხავთ, არ იყო ამის აუცილებლობა — ზარქუა პრაიდზე
• ხელისუფლების ვალდებულებაა, უსაფრთხოება იყოს დაცული, მწამს, ასეც იქნება — სარჯველაძე ღირსების მარშზე

28 ევროპარლამენტარმა შინაგან საქმეთა მინისტრ ვახტანგ გომელაურს მოუწოდა, დაიცვას Tbilisi Pride-ის მონაწილეები და მათი გამოხატვის თავისუფლებისა და მშვიდობიანი შეკრების უნივერსალური უფლების განხორციელება უზრუნველყოს.

წერილში საუბარია ქართული ოცნების თავმჯდომარის, ირაკლი კობახიძის ბოლოდროინდელი კომენტარზე, რომელმაც თქვა, რომ ღირსების მარში უნდა გაუქმებულიყო. ევროპარლამენტარების შეფასებით, ეს განცხადება ადამიანის უნივერსალურ უფლებებს ეწინააღმდეგება.

პარლამენტის თავმჯდომარის, კახა კუჭავას აზრით, ევროპარლამენტარების მიმართვა საჭირო იქნებოდა, "ამის საფუძველი რომ არსებობდეს".

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.