ქართული ოცნების დეპუტატი, შალვა პაპუაშვილი პრაიდის კვირეულზე ამბობს, რომ თუ "მათ [ორგანიზატორებს] რაიმე ქმედება სურთ, სურთ", მაგრამ ამავე დროს ყველას აქვს უფლება, საკუთარი შეხედულება და შეფასება ჰქონდეს. კითხვაზე — ეს შეფასებები ზღუდავს თუ არა გამოხატვის თავისუფლებას და ახალისებს თუ არა ჰომოფობიას, პაპუაშვილი გვპასუხობს, რომ სიტყვა ვინმეს ქმედებას ვერ შეზღუდავს.

"როგორ შეიძლება, სიტყვამ ვინმეს ქმედება შეზღუდოს. მან [ირაკლი კობახიძემ] გამოხატა თავისი პოზიცია ზოგადად, სიტყვა ვინმეს ქმედებას ვერ შეზღუდავს. თუ მათ რაიმე ქმედება სურთ, სურთ, მაგრამ ამავე დროს, ყველას აქვს უფლება, საკუთარი შეხედულება და შეფასება ჰქონდეს", — ამბობს ის.

მისივე თქმით, ყველას შეუძლია ისარგებლოს საქართველოს კანონმდებლობით, რომელიც სხვადასხვა მიზნით ადამიანების თავყრილობას განსაზღვრავს.

"მეორე მხრივ, ეს, რა თქმა უნდა, არ გამორიცხავს შეფასებებს და მოსაზრებებს ამასთან დაკავშირებით. ამიტომ, საერთო ჯამში, ყველამ უნდა ვისარგებლოთ ჩვენი კანონმდებლობით. ამ კანონმდებლობის ჩარჩოში ვიმოქმედოთ, რაც კანონმდებლობის ჩარჩოშია, რა თქმა უნდა, ყველას შეუძლია ისარგებლოს ამ უფლებებით. მეორე მხრივ, ყველას აქვს [უფლება] საკუთარი შეფასებები გამოხატოს", — აცხადებს პაპუაშვილი.

28 ევროპარლამენტარმა შინაგან საქმეთა მინისტრ ვახტანგ გომელაურს მოუწოდა, დაიცვას Tbilisi Pride-ის მონაწილეები და მათი გამოხატვის თავისუფლებისა და მშვიდობიანი შეკრების უნივერსალური უფლების განხორციელება უზრუნველყოს.

წერილში საუბარია ქართული ოცნების თავმჯდომარის, ირაკლი კობახიძის ბოლოდროინდელი კომენტარზე, რომელმაც თქვა, რომ ღირსების მარში უნდა გაუქმებულიყო. ევროპარლამენტარების შეფასებით, ეს განცხადება ადამიანის უნივერსალურ უფლებებს ეწინააღმდეგება.

ისინი ხელისუფლებას ადამიანის უფლებათა ევროპული კონვენციისა და ევროკავშირსა და საქართველოს შორის ასოცირების ხელშეკრულების შესაბამისად საქართველოს მიერ ნაკისრ ვალდებულებებსაც ახსენებენ და წერენ, რომ მნიშვნელოვანია საქართველოს ხელისუფლებამ პოლიციის მხრიდან მარშის მონაწილეების სათანადო და ეფექტური დაცვა უზრუნველყოს.

პარლამენტის თავმჯდომარის, კახა კუჭავას აზრით, ევროპარლამენტარების მიმართვა საჭირო იქნებოდა, "ამის საფუძველი რომ არსებობდეს".

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.