ქართული ოცნების ერთ-ერთმა ლიდერმა, მამუკა მდინარაძემ ღირსების მარშთან დაკავშირებით განაცხადა, რომ თუ რომელიმე ჯგუფის აქტივობა პროვოკაციული მიზნებისკენ არის მიმართული, მაშინ ასეთი აქტივობა არ უნდა განხორციელდეს.

"სამ რამეს ვიტყვი, პირველი — ჩვენ ვართ ანტიდისკრიმინაციული კანონის ავტორები და მიგვაჩნია ყველას უკლებლივ, ყველას სახელით თამამად ვსაუბრობ, რადგან ყველას აზრი ვიცი, მიგვაჩნია, რომ ყველას უფლება უნდა იყოს დაცული და არის დაცული შესაძლებლობების მაქსიმუმის ზღვარზე. ეს პირველი. მეორე — დღეს გგონიათ, რომ დღეს ვართ ჩვენ სხვა პოზიციაზე და ოდესმე სიხარულით ვხვდებოდით, რომ კი, უნდა ჩატარდეს აუცილებლად? მესამე — აქ იმაზე კი არაა მაინც და მაინც აქცენტი, რომ ეს პრაიდია და ა.შ. სხვა ჯგუფიც რომ იყოს, ნებისმიერი განსხვავებული თუ არაგანსხვავებული, მათ შორის და შემთხვევით არ ვამბობ ამას, თუ რომელიმე ჯგუფის კონკრეტული აქტივობა ემსახურება არა რეალურად ვიღაცის უფლების დაცვას, მის გაუმჯობესებას, მისი ხარისხის აწევას, არამედ პროვოკაციულ მიზნებს მე პირადად და ჩემი გუნდის წევრების უმრავლესობას, დარწმუნებული ვარ, ასევე, მიაჩნია, რომ ასეთი აქტივობები არის დამაზიანებელი და ასეთი აქტივობებისგან ყველამ თავი უნდა შეიკავოს. ვიმეორებ, თუ რომელიმე ჯგუფის მიზანი აქტივობისა არის პროვოკაციული, ასეთი ქმედებისგან ყველამ თავი უნდა შეიკავოს", — განაცხადა მდინარაძემ TV პირველის ეთერში.

28 ევროპარლამენტარმა შინაგან საქმეთა მინისტრ ვახტანგ გომელაურს მოუწოდა, დაიცვას Tbilisi Pride-ის მონაწილეები და მათი გამოხატვის თავისუფლებისა და მშვიდობიანი შეკრების უნივერსალური უფლების განხორციელება უზრუნველყოს.

წერილში საუბარია ქართული ოცნების თავმჯდომარის, ირაკლი კობახიძის ბოლოდროინდელი კომენტარზე, რომელმაც თქვა, რომ ღირსების მარში უნდა გაუქმებულიყო. ევროპარლამენტარების შეფასებით, ეს განცხადება ადამიანის უნივერსალურ უფლებებს ეწინააღმდეგება.

ისინი ხელისუფლებას ადამიანის უფლებათა ევროპული კონვენციისა და ევროკავშირსა და საქართველოს შორის ასოცირების ხელშეკრულების შესაბამისად საქართველოს მიერ ნაკისრ ვალდებულებებსაც ახსენებენ და წერენ, რომ მნიშვნელოვანია საქართველოს ხელისუფლებამ პოლიციის მხრიდან მარშის მონაწილეების სათანადო და ეფექტური დაცვა უზრუნველყოს.

პარლამენტის თავმჯდომარის, კახა კუჭავას აზრით, ევროპარლამენტარების მიმართვა საჭირო იქნებოდა, "ამის საფუძველი რომ არსებობდეს".

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.