"5-ში თუ გადიხარ, ამას სხვებისთვის არ აკეთებ — საკუთარი თავისთვის აკეთებ" — ასე ეხმიანება გირჩი — მეტი თავისუფლების ლიდერი ზურაბ ჯაფარიძე თბილისი პრაიდის ფარგლებში დაგეგმილ ღირსების მარშს. ჯაფარიძე აცხადებს, რომ მოქალაქეებს სურთ ქუჩაში ერთად გავლა და თავისი სათქმელის თქმა, რის უფლებასაც არ აძლევენ და ფიზიკური ანგარიშსწორებით ემუქრებიან.

აქედან გამომდინარე ის აღნიშნავს, რომ ადამიანებს არ უნდა ეგონოთ, თითქოს ქვეყანაში დაცულია მათი გამოხატვის თავისუფლება. მისივე თქმით, თუ დღეს გადაჯეგავენ ერთს, "ხვალ გადაჯეგავენ ვისაც გაუსწორდებათ".

"არანაირი მნიშვნელობა არ აქვს, რას ითხოვენ ეს ადამიანები. არანაირი მნიშვნელობა არ აქვს, რა შეიძლება მოითხოვონ მომავალში. არანაირი მნიშვნელობა არ აქვს, რა დღის წესრიგი აქვთ დასავლეთში ლგბტ ჯგუფებს, ეთანხმები ამ დღის წესრიგს თუ არა, ადამიანებს უნდათ ქუჩაში გავლა, ამით რაღაცის თქმა და ამის გამო, მათ სიცოცხლეს და ჯანმრთელობას ემუქრება რეალური საფრთხე. ესაა აქ მთავარი", — წერს ის ფეისბუქგვერდზე.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.