პარლამენტის თავმჯდომარე კახა კუჭავა ღირსების მარშზე ევროპარლამენტარების გამოგზავნილი წერილის პასუხად ამბობს, რომ "მიმართვა საჭირო იქნებოდა, ამის საფუძველი რომ არსებობდეს". მისი თქმით, შესაბამისი უწყებები სწორად მუშაობენ და მათი ვალდებულებაა, დაიცვან უსაფრთხოება.

"ქართული ოცნება არის ის ხელისუფლება, რომელმაც მიიღო უმნიშვნელოვანესი კანონი, ანტიდისკრიმინაციული და დღეს თამამად შეგვიძლია ვთქვათ, რომ არცერთ ჯგუფს არ აქვს გამოხატვის შეზღუდვა და რაც ყველაზე მთავარი არის, მიმართვა საჭირო იქნებოდა, ამისა საფუძველი რომ არსებობდეს, შესაბამისი უწყებები არ მუშაობდნენ სწორად. ვალდებულია სახელმწიფო, დაიცვას წესრიგი, უსაფრთხოება და გამოხატვის თავისუფლება, ამიტომ დარწმუნებული ვარ, მოწოდების სიმაღლეზე იქნებიან.

ჩემი მხრიდან მნიშვნელოვანი არის, რომ ნებისმიერი აქცია იქნება, თუ კონტრაქცია, ჩატარდეს მშვიდობიანად. ეს არის მთავარი ამოცანა, რომელიც უნდა უზრუნველყონ პირველ რიგში სამართალდამცავებმა ორგანოებმა", — განაცხადა მან პალიტრანიუსის ეთერში.

გარდა ამისა, კუჭავამ იმედი გამოთქვა, რომ პროცესი არ გადაიზრდება ძალადობაში, ის დარწმუნებულია, რომ ამის მომხრე არცერთი მხარე არ არის. თუმცა, აღსანიშნია, რომ ჰომოფობიური ჯგუფები ძალადობრივ მოწოდებებს აკეთებენ.

"არავის არცერთ შემთხვევაში არ წაადგება ძალადობრივი ქმედებები. თუ რამე ადრე მომხდარა ნამდვილად არ იყო ლამაზი დასანახი. არ შეიძლება, ვინმე მომხრე იყოს ძალადობის და აუცილებელია, ამ შემთხვევაშიც მაქსიმალურად მშვიდობიანად მოვახერხოთ ამ დღის, თუ ამ კვირეულის ჩატარება", — განაცხადა მან.

28 ევროპარლამენტარმა შინაგან საქმეთა მინისტრ ვახტანგ გომელაურს მოუწოდა, დაიცვას Tbilisi Pride-ის მონაწილეები და მათი გამოხატვის თავისუფლებისა და მშვიდობიანი შეკრების უნივერსალური უფლების განხორციელება უზრუნველყოს.

წერილში საუბარია ქართული ოცნების თავმჯდომარის, ირაკლი კობახიძის ბოლოდროინდელი კომენტარზე, რომელმაც თქვა, რომ ღირსების მარში უნდა გაუქმებულიყო. ევროპარლამენტარების შეფასებით, ეს განცხადება ადამიანის უნივერსალურ უფლებებს ეწინააღმდეგება.

ისინი ხელისუფლებას ადამიანის უფლებათა ევროპული კონვენციისა და ევროკავშირსა და საქართველოს შორის ასოცირების ხელშეკრულების შესაბამისად საქართველოს მიერ ნაკისრ ვალდებულებებსაც ახსენებენ და წერენ, რომ მნიშვნელოვანია საქართველოს ხელისუფლებამ პოლიციის მხრიდან მარშის მონაწილეების სათანადო და ეფექტური დაცვა უზრუნველყოს.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადას აძლევს.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.