ლეგენდარულმა მსახიობმა და აქტივისტმა ჯეინ ფონდამ ინტერვიუს დროს აქამდე უცნობი ამბავი გაამხილა და თქვა, რომ ის ბავშვობაში სექსუალური ძალადობის მსხვერპლი გახდა.

"ბავშვი ვიყავი როდესაც გამაუპატიურეს და საზოგადოების მსგავსი თემებისადმი დამოკიდებულების გამო ეს ყოველთვის ჩემი ბრალი მეგონა", - თქვა ინტერვიუს დროს 79 წლის ფონდამ.

ჯეინ ფონდა წლებია საკუთარ თავს ფემინისტს უწოდებს და აქტიურად არის ქალთა უფლებების დაცვაში ჩართული.

"მსხვერპლს საზოგადოება ყოველთვის აჯერებს, რომ დამნაშავეები ისინი არიან. ქალთა მოძრაობების ერთ-ერთი მთავარი მიღწევა კი სწორედ ის არის, რომ ვიგებთ, თურმე როცა ჩვენზე ძალადობენ ეს სულაც არ არის ჩვენი ბრალი", - ამბობს ჯეინი.

მსახიობმა ისაუბრა იმაზეც, რომ წლების წინ დედამისის თვითმკვლელობა სწორედ მასზე განხორციელებული ძალადობის შედეგი იყო.

"დედაჩემი 42 წლის იყო როდესაც ძალადობის მსხვერპლი გახდა, ამის გამო თავი მოიკლა, მაშინ სულ რაღაც 12 წლის ვიყავი. ყველამ უნდა ისაუბროს ამ თემაზე, მსახიობებმა, მხატვრებმა, მწერლებმა, პოეტებმა, ჩვენ უნდა ვისაუბროთ იმაზე, რაზეც სამწუხაროდ პოლიტიკოსები დუმილს ამჯობინებენ.", - თქვა ჯეინ ფონდამ.

ჯეინ ფონდა ორი ოსკარის მფლობელი ამერიკელი მსახიობი, მწერალი და პოლიტიკური აქტივისტი. ის ცნობილია ვიეტნამისა და ერაყის ომის საწინააღმდეგო კამპანიებითა და ასევე ბირთვულ შეიარაღებასთან ბრძოლით.