პოლიციამ თბილისში არასრულწლოვანი დააკავა. მას ბრალად სხვების, მათ შორის არასრულწლოვნების, ფოტოების სოციალური ქსელებიდან ჩამოტვირთვა, სპეციალური პროგრამით მათი პორნოგრაფიული შინაარსის ფოტოებად გადაკეთება (დამონტაჟება) და შეურაცხმყოფელ ტექსტებთან ერთად ინტერნეტში გავრცელება ედება. ინფორმაციას შსს ავრცელებს.

საქმეზე გამოძიება მიმდინარეობს სისხლის სამართლის კოდექსის შესაბამისი მუხლით, რაც 15 წლამდე პატიმრობას ითვალისწინებს.

"შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, ჩატარებული საპოლიციო ღონისძიებების შედეგად, წინასწარი შეცნობით არასრულწლოვანის გამოსახულების შემცველი პორნოგრაფიული ნაწარმოების შეძენა-შენახვა-ფლობის და გავრცელების ბრალდებით, არასრულწლოვანი დააკავეს.

გამოძიებით დადგინდა, რომ ბრალდებულმა სოციალური ქსელების მომხმარებელთა ღია პროფილებიდან ჩამოტვირთა სხვადასხვა პირის, მათ შორის არასრულწლოვანთა ფოტოსურათები, რომლებიც პროგრამული უზრუნველყოფის გამოყენებით დაამონტაჟა, მიანიჭა არასრულწლოვანის გამოსახულების შემცველი პორნოგრაფიული ნაწარმოების იერსახე და შეურაცხმყოფელ ტექსტებთან ერთად ერთ-ერთ სოციალურ ქსელში გაავრცელა.

სამართალდამცველებმა ჩატარებული კომპლექსური საგამოძიებო მოქმედებების შემდეგ დამნაშავე პირი ბრალდებულის სახით თბილისში დააკავეს.

გამოძიება სისხლის სამართლის კოდექსის 255-ე მუხლის მე-3 და მე-4 ნაწილებით მიმდინარეობს, რაც 15 წლამდე ვადით თავისუფლების აღკვეთას ითვალისწინებს", — წერია უწყების განცხადებაში.