ერთიანი ნაციონალური მოძრაობის ყრილობაზე პარტიის მოქმედი თავმჯდომარე თინა ბოკუჩავა მივიდა. ბოკუჩავამ მედიასთან საუბრისას განმარტა, რომ ის ყრილობაზე სამი მიზეზით იმყოფება — მადლობა გადაუხადოს თავის მხარდამჭერებს, დააფიქსიროს პოზიცია, რომ მისთვის თანამდებობას მნიშვნელობა არ აქვს და წარმატება უსურვოს ყრილობაში მონაწილე პირებს.

"სამი მიზეზით ვარ მე დღეს ყრილობაზე მოსული:

უპირველეს ყოვლისა, რომ მადლობა ვუთხრა ჩვენს მხარდამჭერებს — იმ ადამიანებს, ვინც დღეს არიან დელეგატები ყრილობაზე — იმ ნდობისთვის, რომელიც მათ მომანიჭეს ორი წლის წინ, რომ ორი წლის განმავლობაში მემსახურა პარტიისთვის, როგორც პარტიის თავმჯდომარეს. ჩემთვის ყველაზე მნიშვნელოვანი დღეს ჩემი აქ მოსვლით იყო სწორედ ეს.
მეორე იყო ის, რომ თუ აქამდე ვინმემ ვერ გაიგო, კიდევ ერთხელ გაეგოთ, რომ ჩემთვის მთავარია ბრძოლა და არანაირ თანამდებობას არასოდეს მნიშვნელობა არ ჰქონია — მთავარია ბრძოლა, მთავარია სიმართლე, მთავარია ღირსება და მთავარია ის გამარჯვება, რომელიც ჩვენ ყველამ ერთად უნდა მოვიპოვოთ.

და ბოლოს, რა თქმა უნდა, მესამე მიზეზი, რის გამოც მე დღეს აქ მოვედი, არის ის, რომ მინდა წარმატება ვუსურვო ყველა იმ ადამიანს, ვინც დღევანდელ ყრილობაზე აიღებს პასუხისმგებლობას, რომ მართოს "ერთიანი ნაციონალური მოძრაობა," — განაცხადა ბოკუჩავამ.

ბოკუჩავამ უარყო პარტიის დატოვება და განმარტა, რომ ის ბრძოლას პოლიტსაბჭოს რიგით წევრად გააგრძელებს.

"მე დღესაც მივიღე შემოთავაზება გარკვეულ თანამდებობებთან დაკავშირებით, მაგრამ მიმაჩნია, რომ ახლა ყველაზე სწორი ჩემი მხრიდან იქნება ის, რომ ბრძოლა ჩემი ქვეყნის უკეთესი მომავლისთვის გავაგრძელო, როგორც ერთიანი ნაციონალური მოძრაობის პოლიტსაბჭოს რიგითმა წევრმა.

ჩემი კანდიდატურის დასახელებაც, შესაბამისად, არ მოხდა იმისთვის, რომ შემდგომ არ შექმნილიყო უხერხულობა ამ საკითხთან დაკავშირებით. როგორც არაერთხელ განვმარტე, ეს არის დროებითი ორგანოს დროებითი სტრუქტურა, რომელიც იქმნება, რამდენადაც მე მესმის, 6 თვით და, შესაბამისად, მე ჩემს თავს ვერ ვხედავ ამ დროებითი მართვის სტრუქტურაში. პარტიიდან არსად წასვლას არ ვაპირებ," — განაცახდა ბოკუჩავამ.

შეგახსენებთ, ერთიანი ნაციონალური მოძრაობის პოლიტიკური მდივნის, გიორგი ბარამიძის განცხადებით, 5 აგვისტოს დაგეგმილ ყრილობაზე მნიშვნელოვანი რეფორმები განხორციელდება. ბარამიძის განმარტებით, ყრილობა აღარ აირჩევს თავმჯდომარეს ძველი წესით და პარტიის წევრები საწევროს გადაიხდიან.

ერთიანი ნაციონალური მოძრაობის ყრილობა 5 აგვისტოს იმართება. მოქმედი თავმჯდომარე თინათინ ბოკუჩავა ენმ-ის პოლიტსაბჭოს სხდომას არ დასწრებია — ის აჭარაში იმყოფება. კითხვაზე — რატომ არ გადადო პარტიამ პოლიტსაბჭოს სხდომა, რომ მას თავმჯდომარეც დასწრებოდა, ცისკარიშვილმა უპასუხა, რომ "ყველას ლოჯისტიკურ გეგმებს ვერ მოერგებოდნენ". დაესწრება თუ არა თინათინ ბოკუჩავა 5 აგვისტოს ყრილობას, ცისკარიშვილმა არ იცის.