იმერეთის პოლიციამ ჯანმრთელობის განზრახ მძიმე დაზიანების ბრალდებით ძებნილი მამაკაცი დააკავა. ბრალდებული წარსულში სხვადასხვა დანაშაულისთვის უკვე იყო ნასამართლევი და ამჟამადაც პირობითი მსჯავრის ქვეშ იმყოფებოდა.

გამოძიების ცნობით, შემთხვევა ხარაგაულის მუნიციპალიტეტში, 12 ივლისს მოხდა. ბრალდებულმა ურთიერთშელაპარაკებისას ნაცნობი მამაკაცი დანით დაჭრა, რის შემდეგაც შემთხვევის ადგილიდან მიიმალა. დაშავებული კლინიკაში გადაიყვანეს.

სამართალდამცველებმა სავარაუდო დამნაშავის ვინაობა მალევე დაადგინეს და მასზე ძებნა გამოაცხადეს. პოლიციამ ის იმერეთში დააკავა.

დაკავებულს 7 წლამდე პატიმრობა ემუქრება.

"შინაგან საქმეთა სამინისტროს იმერეთის პოლიციის დეპარტამენტის თანამშრომლებმა, ჯანმრთელობის განზრახ მძიმე დაზიანებისთვის ძებნილი, წარსულში სხვადასხვა დანაშაულისთვის ნასამართლევი და ამჟამად პირობითი მსჯავრის ქვეშ მყოფი პირი დააკავეს.
გამოძიებით დადგინდა, რომ აღნიშნულმა პირმა, მიმდინარე წლის 12 ივლისს, ხარაგაულის მუნიციპალიტეტში, ურთიერთშელაპარაკების ნიადაგზე, ცივი იარაღის გამოყენებით ნაცნობი მამაკაცი დაჭრა და შემთხვევის ადგილიდან მიიმალა.

დაჭრილი მამაკაცი სამედიცინო დახმარების გაწევის მიზნით კლინიკაში გადაიყვანეს.
სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულის ჩამდენი პირის ვინაობა მალევე დაადგინეს და მასზე ძებნა გამოცხადდა. პოლიციამ ძებნილი პირი იმერეთის რეგიონში დააკავა.

გამოძიება სისხლის სამართლის კოდექსის 117-ე მუხლით მიმდინარეობს, რაც 7 წლამდე ვადით თავისუფლების აღკვეთას ითვალისწინებს", — აღნიშნულია უწყების განცხადებაში.