ჩრდილოეთ კორეის სარაკეტო ქვედანაყოფმა რუსეთში განლაგება დაიწყო. უკრაინის სამხედრო დაზვერვის ცნობით, ის შესაძლოა 120 ბალისტიკური რაკეტითა და 6 გამშვები დანადგარით აღიჭურვოს, რომლებიც უკრაინის წინააღმდეგ დარტყმებისთვის იქნება გამოყენებული. ინფორმაციას Reuters ავრცელებს.

როგორც სააგენტო აღნიშნავს, უკრაინა თანამედროვე საჰაერო თავდაცვის სისტემების მწვავე დეფიციტს განიცდის, რუსეთი კი ამით სარგებლობას ბალისტიკური რაკეტების ინტენსიური გამოყენებით ცდილობს, რომელთა ჩამოგდებაც განსაკუთრებით რთულია.

2023 წლის ბოლოდან რუსეთმა უკრაინის მიმართულებით ათობით ჩრდილოეთ კორეული ბალისტიკური რაკეტა გაუშვა, თუმცა უშუალოდ ჩრდილოეთ კორეის სარაკეტო ძალების განლაგება მოსკოვსა და ფხენიანს შორის არსებული სამხედრო თანამშრომლობის მასშტაბების კიდევ უფრო გაზრდაზე მიუთითებს.

უკრაინის თავდაცვის სამინისტროს დაზვერვის მთავარი სამმართველოს (GUR) წარმომადგენლის, ანდრი ჩერნიაკის თქმით, რუსეთი გეგმავს, ჩრდილოეთ კორეის დაახლოებით 90-კაციანი სარაკეტო ჯგუფი ვორონეჟის ოლქში, რუსეთის 112-ე სარაკეტო ბრიგადის ბაზაზე განათავსოს.