ტელეკომპანია "ფორმულას" ჟურნალისტმა, ვახო სანაიამ, მცხეთის იზოლატორი დატოვა. ჟურნალისტს სოციალურ ქსელში გამოქვეყნებული პოსტის გამო 14-დღიანი ადმინისტრაციული პატიმრობა 22 ივლისს შეეფარდა. სანაიას შემთხვევა პირველია, როდესაც მოქალაქეს სოციალურ ქსელში დაწერილი პოსტისთვის თავისუფლების აღკვეთა შეეფარდა.

"ვერანაირი პატიმრობა, ვერანაირი ჯარიმა და ვერანაირი დარბევა ვერ მოახდენს ჩვენზე იმ გავლენას, რა ჩანაფიქრიც შეიძლება ჰქონდეს ამ ქვეყნის დე ფაქტო მმართველს. იმიტომ, რომ რამდენჯერაც არ უნდა ჩაგვსვან ციხეში და რა ჯარიმაც არ უნდა გამოწერონ, ჩვენი ბრძოლა მაინც გაგრძელდება.

ყველას შევახსენებ ჩვენს სლოგანს – ძალიან მარტივ, გასაგებ და მკაფიო სლოგანს: ბოლომდე, სულ ბოლომდე – გამარჯვებამდე! [...]

კიდევ დავწერ, ბევრჯერ დავწერ... იმდენჯერ დავწერ, რამდენჯერაც მომესურვება. მოდი, მარტივი შეკითხვა დაუსვას თავის თავს ივანიშვილმა: აი, რა მიიღო ახლა იმით, რომ დამაპატიმრა, გარდა იმისა, რომ თავისი მარიონეტის სახელი კიდევ უფრო დამკვიდრდა ამ საზოგადოებაში?! პაპუაშვილის თუ ნებისმიერი სხვის, რომელთა შესახებაც ასევე დავწერ," — განაცხადა სანაიამ "ტვ პირველთან" საუბრისას.