მთავრობის სხდომაზე ირაკლი კობახიძემ განაცხადა, რომ საქართველო მზადაა, ნაურუს რესპუბლიკასთან დაამყაროს დიპლომატიური ურთიერთობები და ხელი შეუწყოს თანამშრომლობის გაღრმავებას.

მისი განმარტებით, ნაურუს რესპუბლიკის მხრიდან ე.წ. აფხაზეთის რესპუბლიკასთან და ე.წ. სამხრეთ ოსეთის რესპუბლიკასთან დიპლომატიური ურთიერთობების გაუქმებამ ურთიერთობების გამტკიცების სურვილი დაადასტურა.

"21 ივლისს ნაურუს რესპუბლიკის მთავრობამ მიიღო გადაწყვეტილება ე.წ. აფხაზეთის რესპუბლიკის და ე.წ. სამხრეთ ოსეთის რესპუბლიკის დიპლომატიური ურთიერთობების გაუქმების შესახებ. ამ გადაწყვეტილებით კიდევ ერთხელ დასტურდება, რომ საერთაშორისო სამართლის ნორმების პატივისცემა და დაცვა არის ჯანსაღი საერთაშორისო ურთიერთობების საფუძველი. საქართველო მზადაა, ნაურუს რესპუბლიკასთან დაამყაროს დიპლომატიური ურთიერთობები და ხელი შეუწყოს თანამშრომლობის გაღრმავებას," — განაცხადა კობახიძემ.

კობახიძემ აღნიშნულზე მაკა ბოჭორიშვილს და თითოეულ დიპლომატს მადლობა გადაუხადა.

შეგახსენებთ, ნაურუს რესპუბლიკამ ოკუპირებულ ცხინვალის რეგიონთან და ოკუპირებულ აფხაზეთთან დიპლომატიური ურთიერთობები გააუქმა. ამის შესახებ ინფორმაციას საგარეო უწყება ავრცელებს. უწყება წერს, რომ "საქართველო გამოთქვამს მზადყოფნას დაამყაროს ნაურუს რესპუბლიკასთან დიპლომატიური ურთიერთობები".