სომხეთის სამოციქულო ეკლესიის მეთაური, კათოლიკოსი გარეგინ II და ექვსი სხვა მაღალი იერარქი სასამართლოს წინაშე წარდგებიან. ამის შესახებ ინფორმაციას სააგენტო Reuters ავრცელებს.

სააგენტოს ცნობით, ეს ნაბიჯი ეკლესიასა და პრემიერმინისტრ ნიკოლ ფაშინიანის მთავრობას შორის გამწვავებული დაპირისპირების მორიგი ესკალაციაა. 1999 წლიდან ეკლესიის ლიდერსა და სხვა ბრალდებულებს ედავებიან სამოქალაქო სასამართლოს იმ გადაწყვეტილების შეუსრულებლობას, რომლითაც დროებით აღდგა ეკლესიის მიერ ხარისხაყრილი ეპისკოპოსი, გევორგ საროიანი. ბრალის დამტკიცების შემთხვევაში, სასულიერო პირებს ორ წლამდე პატიმრობა ემუქრებათ.

Reuters აღნიშნავს, რომ ეს არის ყველაზე მასშტაბური სამართლებრივი გამოწვევა სომხური სამოციქულო ეკლესიის ხელმძღვანელობისთვის. დაპირისპირება განსაკუთრებით გამწვავდა ფაშინიანის მმართველობისა და აზერბაიჯანთან სამშვიდობო მოლაპარაკებების ფონზე.

ოპოზიციონერი პოლიტიკოსები, სასულიერო პირები და უფლებადამცველები აცხადებენ, რომ პროცესი პოლიტიკურად მოტივირებულია და მთავრობის კრიტიკოსების წინააღმდეგ მიმართული რეპრესიების ნაწილია. არასამთავრობო ორგანიზაცია "უფლებების დაცვა საზღვრებს გარეშეს" იურისტის, ანა მელიქიანის შეფასებით, ეს საქმე ეკლესიის კონსტიტუციურ დამოუკიდებლობას არღვევს და აღმასრულებელი ხელისუფლების მხრიდან საეკლესიო საქმეებში აშკარა ჩარევას წარმოადგენს.

ფაშინიანის ადმინისტრაციასა და პროკურატურას Reuters-ის კითხვებზე პასუხი არ გაუციათ. პრემიერმინისტრმა, რომელიც ეკლესიას რუსეთის ინტერესების გატარებაში ადანაშაულებს, არაერთხელ მოუწოდა კათოლიკოსს გადადგომისკენ. თავად ეკლესია ამ ბრალდებებს უარყოფს.