სტატია შეიცავს სპოილერებს House of the Dragon-ის მესამე სეზონიდან.

მე-3 სეზონის მეშვიდე სერიაში დრაკონის სახლის სიუჟეტი ჯორჯ მარტინის ორიგინალ ისტორიას კიდევ უფრო დაშორდა. თუმცა, სერიალის მე-5 და მე-7 ეპიზოდების რეჟისორი, ნინა ლოპეს-კორადო, დაჟინებით ამტკიცებს, რომ ეს ცვლილებები აუცილებელი იყო, რამაც აზრთა სხვადასხვაობა გამოიწვია.

თავად ჯორჯ მარტინი დრაკონის სახლს უკვე გაემიჯნა, რის მიზეზადაც შოურანერ რაიან კონდალთან უთანხმოება და სცენარში შეტანილი არაერთი ცვლილება დაასახელა. მსგავსი სიუჟეტური გადახვევები სერიალის მესამე სეზონშიც გრძელდება. ამის ნათელი მაგალითია ბოლო სერია, რომელშიც მაყურებელმა პირველად იხილა დრიმფაიერი — ჰელენა ტარგარიენის დრაკონი.

წიგნთან შედარებით, სერიალში ჰელენა ნაკლებად მრისხანე პერსონაჟად არის წარმოჩენილი, რომელიც დრაკონით ფრენაზე უარსაც კი ამბობს. ბოლო ეპიზოდში კი წიგნის სიუჟეტისთვის სრულიად უცხო სცენა ვიხილეთ: მომავლის ხილვაში დრიმფაიერზე ამხედრებული ჰელენა დრაკონს უბრძანებს, ცეცხლი წაუკიდოს მცირე არმიას, რომელიც მისკენ მოემართება. სიუჟეტური ცვლილებების შეფასებისას, რეჟისორმა ნინა ლოპეს-კორადომ განმარტა, რომ ეს ყველაფერი მესამე სეზონის ფინალურ სერიას კიდევ უფრო მეტ სიმძაფრეს შესძენს.

ფოტო: HBO

"მეშვიდე სერიაში წიგნის სიუჟეტიდან ცოტათი მართლაც გადავუხვიეთ. თუმცა, ჩემი აზრით, რაიანისა და სცენარისტების ნამუშევარმა პერსონაჟების სიუჟეტური ხაზები იმაზე მეტად განავითარა, ვიდრე ეს წიგნებში იყო მოცემული. ვიცი, რომ წიგნის ერთგული ფანებისთვის ეს ძალიან საკამათო განცხადებაა, თუმცა მიმაჩნია, რომ მეშვიდე სერიის ის სიუჟეტური ხაზები, რომლებიც მერვე სერიაშიც გაგრძელდება, როგორც სცენარისტებმა, ისე მსახიობებმა ბრწყინვალედ შეასრულეს", — განაცხადა ნინა ლოპეს-კორადომ.

მოახლოებული მერვე სერია დრაკონის სახლის მე-3 სეზონის ფინალი იქნება, რომელიც მაყურებელს დასკვნითი სეზონისთვის მოამზადებს. ბოლო სერიაში მაყურებელი ტამბლტონის ბრძოლას იხილავს, რომელიც წიგნში აღწერილი ერთ-ერთ ყველაზე სასტიკი და სისხლისმღვრელი დაპირისპირებაა.