გირჩი — მეტი თავისუფლების ლიდერი, ზურაბ ჯაფარიძე მამუკა ხაზარაძის ინიციატივასთან დაკავშირებით ამბობს, რომ ამ განცხადებაში საღი აზრი არის.

"ახლა ჩემი პარლამენტში ყოფნა ისედაც დროებითი ამბავია, საკონსტიტუციოში მაქვს სარჩელი, განხილვა რომ დასრულდება, გადაწყვეტილებას ველოდები და ისედაც მანდატი გამიუქმდება, სავარაუდოდ, უახლოეს მომავალში, მაგრამ ის, რაც ლელომ განაცხადა, კი, მაგაში, ჩემი აზრით, საღი აზრი არის. ამნისტიის ნაწილში, ისინი, ჩემი აზრით, გავიდნენ შეთანხმებიდან. ახლა არის მართლმსაჯულების ნაწილი, სადაც უკვე პრინციპში გასულები არიან, რადგან მოსამართლეების დანიშვნის პროცესი შეჩერებული არ არის. ამას მოჰყვება კიდევ საარჩევნო ნაწილი. საარჩევნო საკითხების განხილვა, რომელიც ახლა მიმდინარეობს და თუ ქართული ოცნება არაფერს არ შეასრულებს და დარჩება მხოლოდ ოპოზიცია, რომელიც იქნება ერთგული შარლ მიშელის დოკუმენტის, ამ დოკუმენტს არანაირი შინაარსი არ ექნება, არც რაიმე კრიზისი განმუხტვაზე არ იქნება საუბარი. ერთადერთი საკითხი, რომელიც იქიდან იქნება დარჩენილი, მნიშვნელოვანი, ეს არის 43%-იანი ჩანაწერი, რომელიც არსებობს, რომელმაც მომავალი არჩევნები ოქტომბრის უნდა აქციოს რეფერენდუმად", — განაცხადა ჯაფარიძემ ფორმულას ეთერში.

ლელოს ლიდერი, მამუკა ხაზარაძე მოსამართლეების დანიშვნასთან დაკავშირებით ქართული ოცნების თავმჯდომარის, ირაკლი კობახიძის განცხადებას გამოეხმაურა და მოუწოდა ოპოზიციას, თუ მმართველი გუნდი ამ საკითხის ფორსირებას დაიწყებს, გავიდნენ პარლამენტიდან.

ქართული ოცნების თავმჯდომარემ, ირაკლი კობახიძემ დღეს, 23 ივნისს პოლიტსაბჭოს სხდომის დასრულების შემდეგ მოსამართლეების დანიშვნაზე თქვა, რომ ქართულმა ოცნებამ პოლიტიკური შეთანხმების ყველა პირობა ზედმიწევნით შეასრულა და ამ პროცესის გაჩერებას არ აპირებენ.

17 ივნისს იუსტიციის უმაღლესმა საბჭომ პარლამენტს უზენაესი სასამართლოს მოსამართლეობის 9 კანდიდატს წარუდგინა. კერძოდ, გიორგი გოგიაშვილი, გოჩა აბუსერიძე, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე, ლაშა გოჩიაშვილი. საბჭოს არამოსამართლე წევრი, ნაზი ჯანეზაშვილი On.ge-სთან დადებითად აფასებს ქეთი მესხიშვილისა და ეკა ზარნაძის წარდგენას, თუმცა ამბობს, რომ ამ მოდელით უმრავლესობაში კვლავ ე.წ. კლანი რჩება, კარგი მოსამართლეები კი — უმცირესობაში.

აღსანიშნავია, რომ შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.