"დელტა ამ მიმართულებით აბსოლუტურად სუფთაა" - ასეთი განცხადება გააკეთა დელტას ყოფილმა დირექტორმა, უჩა ძოძუაშვილმა თავდაცვისა და უშიშროების კომიტეტის სხდომის შემდეგ და განმარტა, რომ დელტას სეტყვასაწინააღმდეგო დანადგარებისათვის რაკეტების არარსებობა შესაბამისი თანხების არარსებობის შედეგია.

კახეთში მომხდარი სტიქიის მიზეზები, შედეგები და დელტას საქმიანობა განიხილეს დღეს, 23 მაისს, პარლამენტის თავდაცვისა და უშიშროების კომიტეტის სხდომაზე, რომელსაც კომიტეტის თავჯდომარე, ირაკლი სესიაშვილი უძღვებოდა. სწორედ მან დაუსვა შეკითხვები როგორც თავდაცვის სამინისტროს ამჟამინდელ მაღალჩინოსნებს, ასევე დელტას ყოფილ დირექტორს, უჩა ძოძუაშვილსაც.

როგორც თავდაცვის მინისტრის პირველმა მოადგილემ, დავით ებრალიძემ სხდომის შემდეგ განმარტა, უწყების გენინსპექციას საკითხის მოკვლევა ჯერ არ დაუსრულებია და შესაბამისად დღეს მათ კომიტეტის წევრებს უბრალოდ ინფორმაცია მიაწოდეს.

ჟურნალისტის შეკითხვას, თუ რა შეიძლება გამხდარიყო კახეთში სეტყვასაწინააღმდეგო დანადგარების გაუმართაობის მიზეზი, ებრალიძემ უპასუხა, რომ ამის მიზეზი შესაბამისი რაკეტების არასწორი შესყიდვა ან კიდევ სხვა რაიმე შეიძლებოდა ყოფილიყო. მისი თქმით, დელტას აღნიშნული შესყიდვის განსახორციელებლად ფინანსები ჰქონდა.

რაც შეეხება ირაკლი სესიაშვილის პოზიციას, მან განაცხადა, რომ სხდომაზე დასმულ შეკითხვებზე თავდაცვის სამინისტროსგან ამომწურავი პასუხები მიიღეს:

"მათ შორის თავდაცვის სამინისტროში, თავისთავად, ვგულისხმობ უჩა ძოძუაშვილს, რომელიც ყოფილი ხელმძღვანელია, მაგრამ ამ ეტაპამდე მე მოვიაზრებ ერთ სისტემას".

საკითხთან დაკავშირებით გენერალური ინსპექციას მოკვლევა ჯერ არ დაუსრულებია. თუმცა, როგორც ნობილია, რამდენიმე დღეში გაირკვევა, რა მოხდა კახეთში მომხდარის მიზეზი და რატომ ვერ აირიდეს თავიდან სეტყვა იქ, სადაც სეტყვასაწინააღმდეგო 83 დანადგარია და რატომ ვერ მოხდა ამ დანადგარებისათვის შესაბამისი რაკეტების მიწოდება.

გუშინ, 18 მაისს, კახეთში რამდენიმე დღის წინ მოსული სეტყვის დროს, სახელმწიფო სამხედრო სამეცნიერო-ტექნიკური ცენტრის, დელტას სეტყვის საწინააღმდეგო სისტემის გაუმართაობასთან დაკავშირებით, დელტას გენერალური დირექტორი, უჩა ძოძუაშვილი თანამდებობიდან თავდაცვის მინისტრის ბრძანებით გადააყენეს.

მოგვიანებით ძოძუაშვილმა 20:30-ში განაცხადა, რომ მისთვის აბსურდულია ბრალდება, კახეთში, სეტყვის საწინააღმდეგო სისტემის გაუმართაობასთან დაკავშირებით. მისი თქმით, ის დარწმუნებულია, რომ აღნიშნულ საქმეში დელტას ბრალეულობა არ გამოვლინდება.