საქართველოს კათოლიკოს-პატრიარქის, ილია II სახელით რუსეთის პატრიარქთან, კირილე I-თან გაიგზავნება წერილი ოკუპირებული ცხინვალის დე ფაქტო რეჟიმის მიერ უკანონოდ დაკავებული საქართველოს მოქალაქის, ზაზა გახელაძის საქმეზე შუამდგომლობის თხოვნით. ამის შესახებ გორისა და ატენის მიტროპოლიტმა, მეუფე ანდრიამ განაცხადა.

"ბატონმა მიშამ [ზაზა გახელაძის მამა] და მთელმა ოჯახმა თხოვნით მიმართა სრულიად საქართველოს კათოლიკოს-პატრიარქს, რათა პატრიარქს გაეწია შუამდგომლობა რუსეთის ეკლესიის საჭეთმპყრობელთან ზაზასთან მიმართებაში. მისმა უწმინდესობამ, მინდა ვთქვა, რომ ძალზე გულთან მიიტანა ეს ამბავი და გადაწყდა, რომ პატრიარქის სახელით გაიგზავნება წერილი, წერილი უკვე მზად არის და გადაიგზავნება რუსეთის პატრიარქისადმი და ეკლესიისადმი, რათა უკვე მათ, თავისი მხრიდან, გასწიონ შუამდგომლობა რუსეთის ხელისუფლებისადმი", — განაცხადა მეუფე ანდრიამ.

იგი გახელაძეების ოჯახში ამ თემაზე სასაუბროდ სამთავისისა და კასპის ეპისკოპოსთან, მეუფე დამიანესთან ერთად იმყოფებოდა. ზაზა გახელაძის ცოლმა, ირმა ბუთხუზმა, მთავარი არხის ეთერში განაცხადა, რომ დახმარების თხოვნით მეუფე ანდრიას ორი დღის წინ მიმართეს.

"ჩვენ მივმართეთ თხოვნით გორის ეპარქიის მეუფეს. დღეს უკვე გამოხმაურება მოვიდა სასულიერო პირისგან, რომ ჩვენი წმინდანი, ილია მეორე, მისწერა წერილი რუსეთის პატრიარქს თხოვნით, რომ ეშუამდგომლა და ჩართულიყო ამ პროცესში", — ამბობს ირმა ბუთხუზი.

მეუფე ანდრიას თქმით, პასუხს მიღებისთანავე შეატყობინებენ გახელაძეების ოჯახს.

გაიგე მეტი: