საგარეო საქმეთა მინისტრის, დავით ზალკალიანის განცხადებით, საოკუპაციო რეჟიმის მიერ უკანონოდ დაკავებული ზაზა გახელაძის საქმეზე ყველა საერთაშორისო პლატფორმას იყენებენ. მისი თქმით, ამის შესახებ ოჯახს ინფორმაცია აქვს.

მანვე აღნიშნა, რომ დაგეგმილმა საპროტესტო აქციებმა, შესაძლოა პროვოკაციები გამოიწვიოს და ცუდი გავლენა მოახდინოს გახელაძის გათავისუფლებაზე, ამიტომ უსაფრთხოების სამსახურები მუშაობენ პროვოკაციების არიდებაზე.

"სხვა მიმართულებით მუშაობენ ჩვენი უსაფრთხოების სამსახურები, რომ ამ აქციებმა, რომელიც დაგეგმილია, რაიმე პროვოკაცია არ გამოიწვიოს. იმიტომ, რომ პროვოკაციამ შესაძლებელია მისცეს შემდგომი ზემოქმედების და ცუდად განვითარების შესაძლებლობა ოკუპანტ ქვეყანას და ეს პროვოკაცია გამოიყენონ მათი მიზნებისთვის, რომ არ მოხდეს გათავისუფლება", — განაცხადა მან.

ზალკალიანის თქმით, იყენებენ ისეთ პლატფორმებსაც, რომელზეც საჯაროდ ვერ ისაუბრებს.

"ოჯახმა, რა თქმა უნდა, იცის საგარეო საქმეთა სამინისტროს განხორციელებული ყველა კონკრეტული ქმედების შესახებ. არ დარჩენილა არცერთი უმაღლესი ტრიბუნა, საერთაშორისო ფორმატი, ორმხრივი ურთიერთობის ფორმატი, სადაც გახელაძის საკითხი არ ყოფილიყო წამოწეული განსაკუთრებული სიმწვავით. [...]

საზოგადოებამ უნდა გაითვალისწინოს, რომ საქმე გვაქვს ოკუპანტ ქვეყანასთან. ქვეყანასთან, რომელიც არ ითვალისწინებს საერთაშორისო სამართლის ნორმებს და მას არად არ უღირს ადამიანის ფუნდამენტური უფლებების გათვალისწინება. მე შეიძლება საჯაროდ ვერ ვთქვა სხვა ფორმატები და ბერკეტები, რომელსაც ვიყენებთ, მაგრამ მინდა დაგარწმუნოთ, რომ ყველა არსებული და ასევე სხვა ფორმატები, რომელიც დაგვეხმარება ამ პროცესის დასრულებაში მაქსიმალურად არის გამოყენებული", — განაცხადა მან.

საოკუპაციო რეჟიმის მიერ უკანონოდ დაკავებული ზაზა გახელაძის დედა, ნანა ბუნტური აცხადებს, თუ გახელაძეს თავის დაბადების დღემდე, 23 ივნისამდე არ გაათავისუფლებენ, ოჯახი აქციებს გამართავს. გახელაძის მამა კი ამბობს, რომ შვილის დაბადების დღეზე ცხინვალში გადასვლას აპირებს.

11 ივლისს ერთი წელი გავა მას შემდეგ, რაც ზაზა გახელაძე რუსმა სამხედროებმა დაატყვევეს. ის კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: