ოკუპირებული ცხინვალის დე ფაქტო უშიშროების სამსახური 23 ივნისს უკანონო პატიმრობაში მყოფი ზაზა გახელაძის მხარდასაჭერად გასამართ აქციას პროვოკაციას უწოდებს და მის მონაწილეებს სამართლებრივი პასუხისგებაში მიცემით ემუქრება. მათი მტკიცებით, "ქართული მხარის განცხადებების მიუხედავად, საკითხი საერთაშორისო მექანიზმების ფარგლებში მოაგვაროს, საქართველოში ზოგიერთი ოპოზიციური ძალა მოლაპარაკების პროცესის ჩაშლას ცდილობს".

"მიმდინარე წლის 17 ივნისს საქართველოს საზოგადოებრივი მოძრაობის ძალა ერთობაშიას ლიდერმა, დავით ქაცარავამ Facebook-ის საკუთარ გვერდზე 23 ივნისს კიდევ ერთი პროვოკაციული ინიციატივა დააანონსა, რომლის მიზანი იყო მსჯავრდებულის განთავისუფლების უფრო აქტიური ნაბიჯების გადადგმისკენ საქართველოს მთავრობის წახალისებაა.

ძალა ერთობაშიას საქმიანობის ხასიათის გათვალისწინებით, არ არის გამორიცხული იყოს მცდელობები, რომ მომიტინგეებმა "საზღვარი" უკანონოდ გადაკვეთონ. ამგვარი პროვოკაციული ინიციატივების განხორციელება, განურჩევლად იმისა, ვისგანაც მოდის ის, მოლაპარაკებების პროცესს მნიშვნელოვან ზიანს აყენებს. ხაზს ვუსვამთ, რომ "საზღვარზე" დამყარებული ადმინისტრაციული და სამართლებრივი რეჟიმების დარღვევის მცდელობები მოქმედი "კანონმდებლობის ფარგლებში ჩაიშლება", — ნათქვამია ცხინვალის ე.წ. უშიშროების სამსახურის განცხადებაში.

ხვალ, 23 ივნისს ოკუპირებული ცხინვალის ციხეში უკანონო პატიმრობაში მყოფ ზაზა გახელაძეს დაბადების დღე აქვს. ხვალ გახელაძის ოჯახი სოფელ ქვემო ჭალაში აქციას გამართავენ.

ზაზა გახელაძის მამის თქმით, შექმნილი მდგომარეობისა და ცოლის თვითმკვლელობის მცდელობის გამო აქციების მოწყობა და ერგნეთში გადასვლა გადაწყვიტეს, რათა შვილის გასათავისუფლებლად ყურადღება ამ ფორმით მაინც მიიქციონ.

გახელაძისა და მისი ოჯახისთვის სოლიდარობის გამოსაცხადებლად 23 ივნისს თბილისშიც შეიკრიბებიან, რომლის შემდეგ სოფელ ქვემო ჭალაში ჩავლენ.

11 ივლისს ერთი წელი გავა მას შემდეგ, რაც ზაზა გახელაძე რუსმა სამხედროებმა დაატყვევეს. ის კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: