საერთაშორისო ოლიმპიურმა კომიტეტმა მიმდინარე კვირაში არაერთხელ გააჟღერა მოთხოვნა, რომ ოლიმპიურ სოფელში მცხოვრებებმა ფიზიკურ დისტანციასთან დაკავშირებული რეგულაციები უნდა დაიცვან, წინააღმდეგ შემთხვევაში, ისინი დაჯარიმდებიან, მიიღებენ დისკვალიფიკაციას ან დეპორტაციასაც კი. კომიტეტის გაწერილი წესების მიხედვით, "არიდებული უნდა იქნას ფიზიკური კონტაქტის არასასურველი ფორმები".

ამგვარი განცხადების შემდეგ უხერხული კითხვები გაჩნდა იმ 160 ათასი პრეზერვატივის გარშემო, რომელიც, ტრადიციისამებრ, ოლიმპიურ სოფელში უნდა დარიგდეს.

1988 წელს სეულში გამართული ოლიმპიადის შემდეგ, უსაფრთხო სექსის შესახებ ცნობიერების ასამაღლებლად ასობით ათასი უფასო პრეზერვატივი მასშტაბურ სპორტულ ღონისძიებაზე მონაწილეებს ყოველთვის ურიგდებათ. თუმცა, წლევანდელ ოლიმპიადაზე მოქმედი წესების 33-გვერდიანი კრებულის მიხედვით, კონდომებს ამჯერად მხოლოდ "სუვენირის" დანიშნულება აქვთ.

ორგანიზატორების თქმით, პრეზერვატივები 15 ათას სპორტსმენს ოლიმპიურ სოფელში გამოყენებისათვის არ ურიგდება. ამის ნაცვლად, მათ ისინი შინ უნდა წაიღონ შიდსისა და აივ-ინფექციის შესახებ ცნობიერების ასამაღლებად.

სამხრეთ კორეაში გამართული 2018 წლის ზამთრის ოლიმპიური თამაშების დროს მონაწილეებს 110 ათასზე მეტი პრეზერვატივი დაურიგეს, 2016 წლის რიოს ოლიმპიადის დროს კი მონაწილეებს 450 ათასი კონდომი გადაეცათ.

წელს დასარიგებელ პრეზერვატივებს ოთხი იაპონური მწარმოებელი დაამზადებს.

ფოტო: DPA

წლევანდელ ოლიმპიადაზე უსაფრთხოების სხვა ზომების დაცვაც მოითხოვება. ოლიმპიური კომიტეტის განცხადებით, ღონისძიების დაწყებამდე, 23 ივლისისათვის, მონაწილეების თითქმის 80 პროცენტი სრულად აცრილი იქნება. მიუხედავად ამისა, მათ მაინც მოუწევთ ფიზიკური დისტანციის დაცვა ერთმანეთთან. ორგანიზატორები აპირებდნენ, რომ სპორტსმენებს სადილობა დიდ დარბაზებში ერთად შესძლებოდათ, თუმცა, ახლა ყველა მონაწილეს მოუწოდებენ, რომ მარტომ ისადილოს.