საფრანგეთის პრეზიდენტი ემანუელ მაკრონი რუსეთის მიერ უკრაინაზე მიტანილ იერიშს, რომელმაც ევროკავშირის დელეგაციისა და ბრიტანეთის საბჭოს ოფისები დააზიანა, სოციალურ ქსელში გამოეხმაურა. მისი თქმით, ტერორი და ბარბაროსობაა რუსეთისთვის მშვიდობის იდეა.

"629 რაკეტა და დრონი ერთ ღამეში უკრაინის თავზე: ეს არის რუსეთის მშვიდობის იდეა. ტერორი და ბარბაროსობა.

ათზე მეტი ადამიანი დაიღუპა, მათ შორის ბავშვები.

განზრახ დაბომბეს საცხოვრებელი ტერიტორიები და სამოქალაქო ინფრასტრუქტურა. დაზიანდა ევროკავშირის დელეგაციისა და ბრიტანეთის საბჭოს ოფისები.

საფრანგეთი უმკაცრესად გმობს ამ უაზრო და სასტიკ თავდასხმებს.

სრული მხარდაჭერა უკრაინელ ხალხს და ღრმა თანაგრძნობა ყველა მგლოვიარე ოჯახის მიმართ," — დაწერა ემანუელ მაკრონმა.

ცნობისთვის, ცოტა ხნის წინ, ევროკომისარმა გაფართოების საკითხებში, მარტა კოსმა X-ზე დაწერა, რომ რუსეთის შეტევის შედეგად კიევში ევროკავშირის წარმომადგენლობის შენობა დაზიანდა.