"მაშინ, როდესაც აბსოლუტურად ყველაფერში თანხვედრა გვაქვს, ჩვენთვის გასაკვირია აშშ-ის ადმინისტრაციის დუმილი საქართველოსთან მიმართებით", — ამის შესახებ ქართული ოცნების დეპუტატმა, ლევან მაჭავარიანმა განაცხადა. მისი თქმით, ოცნების გუნდი "მინიმალურ მადლიერებას ელოდა აშშ-სგან და "სამწუხაროდ, ჯერჯერობით აბსოლუტური დუმილია"

"პაუერმა დაადასტურა, რომ მათი დაფინანსებული "ენჯეოები" ერთი მხრივ, სხვადასხვა ქვეყნებში მათთვის მისაღები მთავრობების მიერ ხელისუფლების შენარჩუნებაში იყვნენ ჩართულები — ისეთი მთავრობების, რომლებიც ემსახურება "დიფ სტეიტს" და მეორე მხრივ, ისეთი მთავრობების ხელისუფლებიდან ჩამოშორებით იყვნენ დაკავებულები, რომლებიც არ ემსახურებიან "დიფ სტეიტის" ინტერესებს. საქართველოს მაგალითიც შეგვიძლია მოვიყვანოთ, ამ შემთხვევაში, ისეთ მთავრობებზეა საუბარი, რომელიც ეროვნულია, ზრუნავს ქვეყნის სუვერენიტეტზე და გამოდის ქვეყნის ეროვნული ინტერესებიდან.

ამასთან დაკავშირებითაც, ძალიან რელევანტურია ის გამოძიება, რაც პროკურატურაშია დაწყებული მდიდარ "ენჯეოებთან" მიმართებით, ვგულისხმობ იმ 7 "ენჯეოს", რომლებსაც ანგარიშები აქვთ დაყადაღებული.

ერთადერთი, ჩვენთვის გასაკვირია ამ ყველაფრის ფონზე აშშ-ის ადმინისტრაციის დუმილი საქართველოსთან მიმართებით, მაშინ, როდესაც აბსოლუტურად ყველაფერში თანხვედრა გვაქვს, მაშინ, როდესაც ამ და სხვა მიმართულებაშიც ბატონი ტრამპის მხარდამჭერები ვიყავით და ვართ. ამ ყველაფრის ფონზე, ჩვენ მინიმალურ მადლიერებას ველოდით და სამწუხაროდ, ჯერჯერობით აბსოლუტური დუმილია, რაც ლოგიკურ კითხვის ნიშნებს აჩენს ჩვენს გუნდში", — განაცხადა "ქართული ოცნების" დეპუტატმა, ლევან მაჭავარიანმა.