ბრიუს უილისის მეუღლემ, ემა ჰემინგ უილისმა, პირველად, მსახიობის ჯანმრთელობაზე საჯაროდ ისაუბრა. მისი თქმით, უილისის ჯანმრთელობა სტაბილურია, თუმცა მას "ტვინი ღალატობს" და "საუბარი უჭირს".

"ბრიუსის ჯანმრთელობა, საერთო ჯამში, სტაბილურია, — განუცხადა მან ABC News-ს სამშაბათს გადაცემა Good Morning America-ში — "მას, უბრალოდ, ტვინი ღალატობს".

ჰემინგ უილისის თქმით, მათ აქვთ ბრიუსთან კომუნიკაცია, რომელიც "უბრალოდ განსხვავებულია".

მსახიობს ფრონტოტემპორალური დემენციის დიაგნოზი 2023 წელს დაუსვეს, რაც იმას ნიშნავს, რომ უჯრედები მისი ტვინის იმ ნაწილშია დაზიანებული, რომელიც დაგეგმვაზე, მსჯელობაზე, ემოციებზე, მეტყველებასა და მოძრაობაზეა პასუხისმგებელი.

ბრიუს უილისი ოჯახთან ერთად

ბრიუს უილისი ოჯახთან ერთად

ფოტო: Demi Moore/instagram

ფრონტოტემპორალური დემენციის შემთხვევაში ხშირია ქცევისა და ხასიათის ცვლილებები, პერსონალურ და სოციალურ სიტუაციებში მონაწილეობის უეცარი შეწყვეტა, საუბრისას სათანადო სიტყვების მოფიქრების გართულება, კუნთების სპაზმი, კანკალი და მოძრაობის პრობლემები.

დიდი ბრიტანეთის ალცჰაიმერის კვლევის ცენტრის შეფასებით, აღნიშნული ტიპის დემენცია ქვეყნის მასშტაბით 30 000-ზე მეტ ადამიანს აწუხებს.

რაც შეეხება მის ცოლს, ჰემინგ უილსს, ის თავიდან ფიქრობდა, რომ ქმრის მოვლას მარტო შეძლებდა, რამაც უძილო ღამეები და სოციალური ცხოვრების დაკარგვა გამოიწვია. იმედოვნებს, რომ მისი ახალი წიგნი — მოულოდნელი მოგზაურობა: ძალის, იმედისა და საკუთარი თავის პოვნა მზრუნველობის გზაზე — შესაძლოა, გზამკვლევი და სახელმძღვანელო იყოს სხვა მზრუნველებისთვის, რომელთა ცხოვრებაზეც შესაძლოა დემენციამ ანალოგიურად იმოქმედოს.

ამავე თემაზე: