მინესოტაში, ქალაქ მინეაპოლისში სკოლაზე გახსნილი ცეცხლის შედეგად ორი ბავშვი დაიღუპა და კიდევ 17 დაშავდა. ამ შემთხვევას FBI იკვლევს, როგორც ანტიკათოლიკური სიძულვილის დანაშაულს. ინფორმაციას BBC ავრცელებს.

"FBI ამ სროლას აღიქვამს როგორც შიდა ტერორიზმის ქმედებასა და კათოლიკეების წინააღმდეგ მიმართულ სიძულვილის დანაშაულს," — დაწერა X-ზე FBI-ის დირექტორმა კაშ პათელმა.

ოთხშაბათ დილით, როცა ბავშვები მესას ესწრებოდნენ, თავდამსხმელმა ეკლესიის ფანჯრებიდან სროლა დაიწყო. ორი ბავშვი — რვა და ათი წლის — ადგილზე გარდაიცვალა.

მომხდარის შემდეგ, თავდამსხმელმა ცეცხლსასროლი იარაღით თავი მოიკლა. პოლიციის თქმით, ის 23 წლის რობინ ვესტმენი იყო.

პაპმა ლეო XIV-მ, რომელიც პირველი ამერიკელი პაპია, ამ უბედურ შემთხვევას სიტყვა მიუძღვნა და აღნიშნა, რომ "შეძრულია" მომხდარით. დანაშაულის მოტივი ჯერჯერობით ცნობილი არ არის.

არსებული ინფორმაციით, თავდამსხმელი ეკლესიასთან მივიდა, რომელსაც სკოლაც აქვს და ფანჯრებიდან ცეცხლი სამ იარაღით გახსნა: შაშხანით, თოფითა და პისტოლეტით.

სამხრეთ მინეაპოლისის საცხოვრებელ უბანში მდებარე "ხარების ეკლესიასთან" მოქმედ სკოლაში 5-დან 14 წლამდე მოზარდებს ასწავლიან.

სკოლის 2016 წლის საინფორმაციო ბიულეტენის მიხედვით, თავდამსხმელის დედა, მერიუ გრეის ვესტმანი, წარსულში ამ სკოლაში მუშაობდა. Facebook-ის პოსტის თანახმად, მან 2021 წელს დატოვა სამსახური.