"ვაიმარის სამკუთხედის" ლიდერები მოლდოვას დამოუკიდებლობის დღეს კიშინიოვს ეწვივნენ. ვიზიტი სექტემბერში დაგეგმილი საპარლამენტო არჩევნების წინ, რუსული ჩარევის ბრალდებების ფონზე გაიმართა.

საფრანგეთის პრეზიდენტმა ემანუელ მაკრონმა გერმანიისა და პოლონეთის ლიდერებთან ერთად ვიზიტის დროს პირობა დადო, რომ საფრანგეთი მოლდოვას და მის მიზანს — ევროკავშირში გაწევრიანებას — "გადაწყვეტილებით დაუჭერს მხარს". ამის შესახებ ინფორმაციას ფრანგული მედია ავრცელებს.

პრეზიდენტ მაია სანდუსთან ერთად მდგარმა სამმა ლიდერმა მოლდოვას გამძლეობა შეაქო იმის წინააღმდეგ, რასაც ისინი რუსეთის მხრიდან ჩარევის კამპანიას უწოდებენ.

"ევროკავშირში გაწევრიანება მოლდოვასთვის ისტორიულ შესაძლებლობას წარმოადგენს. ეს ნიშნავს კეთილდღეობას, უსაფრთხოებას, ინფრასტრუქტურის მოდერნიზაციას და რეალურ შესაძლებლობებს ახალგაზრდებისა და ეკონომიკისთვის. საფრანგეთი ამ გზის ყველა ეტაპზე მოლდოვას გვერდით დაუდგება - უზრუნველყოფს ტექნიკურ ექსპერტიზას და დააფინანსებს პრიორიტეტულ პროექტებს მოქალაქეების ცხოვრების გასაუმჯობესებლად. ჩვენ გავაგრძელებთ თანამშრომლობას ენერგეტიკის, ბუნებრივი რესურსებისა და ინფრასტრუქტურის სფეროებში.

…კრემლის პროპაგანდა ამტკიცებს, რომ ევროპელებს ომის გახანგრძლივება სურთ, რაც სიცრუეა — ეს ტყუილია. რუსეთისგან განსხვავებით, ევროკავშირი არავის ემუქრება და პატივს სცემს ყველას სუვერენიტეტს. ევროკავშირი არავითარ შემთხვევაში არ არის საბჭოთა კავშირი", — თქვა საფრანგეთის პრეზიდენტმა, ემანუელ მაკრონმა მოლდოვაში სიტყვით გამოსვლისას.

სანდუს პროევროპული მოკავშირეები, 28 სექტემბრის არჩევნებთან დაკავშირებით, მძიმე გამოწვევის წინაშე დგანან, რადგან ქვეყანაში ხელისუფლება ათწლეულების განმავლობაში მერყეობს პროდასავლურ და პრორუსულ პოლიტიკურ ჯგუფებს შორის.

ცნობისთვის, მოლდოველებმა შარშან გამართულ რეფერენდუმზე უმცირესი უპირატესობით დაუჭირეს მხარი ევროკავშირთან ინტეგრაციისკენ სვლას, თუმცა სანდუს ოპონენტები ამ ნაბიჯს ძლიერ წინააღმდეგობას უწევენ.