უნგრეთის საგარეო საქმეთა მინისტრი პიტერ სიიარტო "დრუჟბას" ნავთობსადენზე განხორციელებულ თავდასხმასთან დაკავშირებით სოციალურ ქსელში წერს. მისი თქმით, უკრაინის ამ ნაბიჯის საპასუხოდ, უნგრეთის მთავრობამ გადაწყვიტა თავდასხმაზე პასუხისმგებელი სამხედრო ნაწილის მეთაურისთვის უნგრეთში და მთლიანად შენგენის ზონაში შესვლა აკრძალოს.

"უკრაინის მიერ "დრუჟბას" ნავთობსადენზე განხორციელებული უკანასკნელი თავდასხმის პასუხად, უნგრეთის მთავრობამ გადაწყვიტა აკრძალოს თავდასხმაზე პასუხისმგებელი სამხედრო ნაწილის მეთაურისთვის უნგრეთში და მთლიანად შენგენის ზონაში შესვლა.

ეს იყო თავდასხმა უნგრეთის სუვერენიტეტზე, რამაც საფრთხე შეუქმნა ჩვენს ენერგეტიკულ უსაფრთხოებას და თითქმის აიძულა სტრატეგიული რეზერვების გამოყენება.

უკრაინას ძალიან კარგად ესმის, რომ "დრუჟბას" ნავთობსადენი სასიცოცხლოდ მნიშვნელოვანია უნგრეთისა და სლოვაკეთის ენერგომომარაგებისთვის და რომ მსგავსი დარტყმები ჩვენთვის გაცილებით დამაზიანებელია, ვიდრე რუსეთისთვის.

ვინც ჩვენს ენერგეტიკულ უსაფრთხოებასა და სუვერენიტეტს დაესხმება თავს, უნდა ელოდოს შედეგებს", — დაწერა სიიარტომ.

უნგრეთის საგარეო საქმეთა მინისტრის ამ გადაწყვეტილებას მალევე გამოეხმაურა უკრაინის საგარეო საქმეთა მინისტრი, ანდრეი სიბიგა, რომელმაც აღნიშნა, რომ უნგრეთი ისტორიის არასწორ მხარეს დგას და უკრაინა საპასუხო ზომებს მიიღებს.

"რა უტიფრობაა ასეთი განცხადების გამოქვეყნება მას შემდეგ, რაც ტერორისტული სახელმწიფო რუსეთი სასტიკი თავდასხმით გამოვიდა.

პიტერ, თუ შენთვის რუსული ნავთობსადენი უფრო მნიშვნელოვანია, ვიდრე უკრაინელი ბავშვები, რომლებიც რუსეთმა დღეს დილით მოკლა, ეს არის მორალური დეგრადაცია. უნგრეთი ისტორიის არასწორ მხარეს დგას.

ჩვენ საპასუხო ზომებს მივიღებთ," — დაწერა ანდრეი სიბიგამ.

ცნობისთვის, დღეს, 28 აგვისტოს ღამით კიევზე რუსეთის მასშტაბური დარტყმის შედეგად დაღუპულთა რიცხვი 12-მდე გაიზარდა და 48 დაშავდა. ინფორმაციას უკრაინული მედია ავრცელებს და კიევის მერზე დაყრდნობით წერს, რომ დაღუპულთა შორის 7, 10 და 11 წლის ბავშვები არიან.

ასევე, 18 აგვისტოს, პიტერ სიიარტომ განცხადება გაავრცელა, სადაც ნათქვამი იყო, რომ მას შემდეგ, რაც უკრაინამ "დრუჟბას" მილსადენზე ტრანსფორმატორულ სადგურს შეუტია, უნგრეთში რუსული ნედლი ნავთობის მიწოდება შეჩერდა.