აშშ და რუსეთი გაწვეულ ელჩებს უკან დააბრუნებენ. ამის შესახებ რუსეთის პრეზიდენტმა, ვალდიმერ პუტინმა ჟენევის სამიტის შემდეგ კონფერენციაზე ისაუბრა. მისი თქმით, კონკრეტულად როდის დაბრუნდებიან ელჩები, ეს ტექნიკური საკითხია.

"ამერიკის ელჩის მოსკოვში და ჩვენი ელჩის ვაშინგტონში დაბრუნებას რაც შეეხება, ჩვენ გადავწყვიტეთ, რომ ისინი თავიანთ საქმიანობას დაუბრუნდებიან. თარიღი, იქნება ეს ხვალ თუ ზეგ, ტექნიკური საკითხია. ჩვენ შევთანხმდით, რომ რუსეთისა და ამერიკის მთავრობები დაიწყებენ კონსულტაციებს მთელ რიგ საკითხებზე. ჩვენ ბევრი გვაქვს სალაპარაკო. მჯერა, რომ ორივე მხარე ცდილობს საერთო შეხების წერტილისა და გამოსავლების პოვნას", — განაცხადა მან.

დღეს ჟენევაში აშშ-სა და რუსეთის პრეზიდენტების სამიტი მიმდინარეობდა. მოლაპარაკებები რამდენიმე საათს გაგრძელდა. ორივე მათგანს ვილა ლა გრანჟში შვეიცარიის პრეზიდენტი, გაი პარმელენი შეხვდა.