აშშ მიესალმება აზერბაიჯანის მიერ სომხეთის 15 მოქალაქის გათავისუფლებას და საქართველოს მთავრობას მადლობას უხდის. აშშ-ის სახელმწიფო მდივნის, ენტონი ბლინკენის განცხადებით, საქართველომ სასიცოცხლოდ მნიშვნელოვანი როლი ითამაში მხარებთან მოლაპარაკებებში.

"ასეთი ნაბიჯები აახლოებს რეგიონის მოსახლეობას მშვიდობიან მომავალთან, რომელსაც ისინი იმსახურებენ", — წერს ბლინკენი.

დღეს, 12 ივნისს დაზერბაიჯანულმა მხარემ კონფლიქტის დროს დაკავებული სომხეთის 15 მოქალაქე გაათავისუფლა და საქართველოს ტერიტორიის გავლით, ისინი საკუთარ ოჯახებს დაუბრუნდნენ. მთავრობის განცხადებით, ეს ირაკლი ღარიბაშვილის ფასილიტაციისა და ევროპისა და ევრაზიის საკითხებში აშშ-ის სახელმწიფო მდივნის მოადგილის მოვალეობის შემსრულებლის, ფილიპ რიკერის ჩართულობით მოხერხდა.

მათივე თქმით, ღარიბაშვილის ჩართულობით, შესაძლებელი გახდა სომხური მხარის მიერ აზერბაიჯანისთვის მნიშვნელოვანი მასალების გადაცემა დანაღმული ტერიტორიების შესახებ.

"დღევანდელი ფაქტის მსგავსი ჰუმანიტარული საკითხების გადაწყვეტა მნიშვნელოვნად დაეხმარება საერთაშორისო საზოგადოების მიზნებს, ხელი შეუწყოს რეგიონში პოლიტიკური და უსაფრთხოების გარემოს გაუმჯობესებას.

მისასალმებელია, რომ საქართველო ამ პროცესის ნაწილია. დღევანდელი დღე მნიშვნელოვანი მაგალითი და წინგადადგმული ნაბიჯი იქნება მეზობლებს შორის არსებული რთული საკითხების გადასაჭრელად. საქართველო მომავალშიც მზად არის, საჭიროებისამებრ, შესაძლებლობების ფარგლებში, დაეხმაროს პარტნიორებს და აქტიურად ჩაერთოს პროცესებში, პირველ რიგში, ჰუმანიტარული საკითხების გადაწყვეტისას", — წერია განცხადებაში.

საგარეო საქმეთა მინისტრის, დავით ზალკალიანის განცხადებით, ბოლო 2-3 თვის განმავლობაში აქტიურად მუშაობდნენ მთავარ სტრატეგიულ პარტნიორთან, იმისთვის, რომ ეს შედეგი დამდგარიყო.