კრუელა ერთ-ერთი ყველაზე ცნობილი ანტიგმირია ანიმაციებისა და კინოს სამყაროში: ის პირველად დისნეის 1961 წლის მულტფილმიდან ას ერთი დალმატინელი გავიცანით, მოგვიანებით კი 1996 წელს გამოსული ამავე სახელწოდების ფილმში ვიხილეთ გლენ ქლოუზის ლეგენდარული შესრულებით.

თუ გავითვალისწინებთ ამ პერსონაჟის უსაზღვრო გავლენას პოპკულტურაზე, გასაკვირი არ არის, რომ დისნეიმ მასზე დამოუკიდებელი ფილმის გადაღება გადაწყვიტა. 3 ივნისს საქართველოს კინოთეატრებშიც შედგა ამ მაღალი მოლოდინების მქონე კინოსურათის პრემიერა და თუ ჯერ ვერ გადაგიწყვეტიათ, გინდათ თუ არა მისი ნახვა, ამ სტატიაში მნიშვნელოვანი სპოილერების მაქსიმალური არიდებით მოგიყვებით, თუ რატომ არ უნდა გადადოთ კრუელას ნახვა.

1. კრუელა დე ვილის სულ სხვა მხარეებს გაიცნობთ

კრუელას აქამდე ისე ვიცნობდით, როგორც სასტიკ ცინიკოსს, რომელსაც ქურქის შესაკერად ძაღლების გატყავება სურდა. შეიძლება კი, ასეთ პერსონაჟსაც ჰქონდეს ის ადამიანური მხარეები, რის გამოც თანავუგრძნობთ მას? ახალ ფილმში კრუელას ბავშვობიდან გავლილ გზას მივადევნებთ თვალს და იმ სავარაუდო მიზეზებსაც გავიგებთ, რამაც მისი პიროვნების ჩამოყალიბებას შეუწყო ხელი.

2. საკულტო ანიმაციიდან პატარა, მაგრამ ემოციურ მსგავსებებსაც დაიჭერთ

მაგალითად, აქაც უყვართ ძაღლებს ტელევიზორის ყურება და იმ ფრაზასაც მოკრავთ ყურს, თუ როგორ ჰგვანან ძაღლები თავიანთ პატრონებს.

3. მთელი ფილმი მოდის ნამდვილი ზეიმია

მოდა გიტაცებთ თუ არა, ეს ფილმი მაინც შეძლებს თქვენს გაოცებას: კოსტიუმების დიზაინერი ჯენი ბევანი ნამდვილ სასწაულებს ახდენს და მაყურებლების დიდი ნაწილი უკვე შეთანხმდა კიდეც, რომ ამის გამო ოსკარიც გარანტირებული აქვს მას.

4. ბევრს იცინებთ

შეიძლება, ბევრი ამას არ ელოდა, მაგრამ კრუელაზე გადაღებული ფილმი პირქუშ და ბნელ გარემოზე მეტად უფრო სახალისო სანახაობა აღმოჩნდა, ამაში კი დიდი წვლილი კრუელას მარჯვენა და მარცხენა ხელებს — ჯასპერსა და ჰორასს მიუძღვით.

5. ძაღლები კვლავ მნიშვნელოვანი პერსონაჟები არიან

ვიღაცებს სიუჟეტის საკვანძო მომენტებში ძაღლების ჩართვა ზედმეტი და არაბუნებრივი მოეჩვენა, მაგრამ, ალბათ, მათ დაავიწყდათ, რომ დისნეის ფილმს უყურებდნენ, სადაც ცხოველების მიერ გამოვლენილი სუპერგმირობა ნამდვილად არ უნდა გვიკვირდეს.

6. გაიცნობთ კრუელაზე მეტად თუ არა, არანაკლებ სასტიკ ახალ ანტიგმირს

ემა ტომპსონის მიერ განსახიერებული ბარონეს ფონ ჰელმანი ერთდროულად ძალიან შემზარავი და მიმზიდველი პერსონაჟია.

7. მთელი ფილმი ერთმანეთზე უკეთესი საუნდტრეკებითაა გაფორმებული

დორის დეის, Queen-ის, ნინა სიმონეს თუ The Rolling Stones-ის სიმღერები განსაკუთრებულ განწყობას შეგიქმნით.

8. ემა სტოუნის საოცარ შესრულებას იხილავთ

კინომოყვარულების დიდი ნაწილი უკვე კარგა ხანია აღიარებს, რომ ემა სტოუნი ერთ-ერთი ყველაზე ნიჭიერი თანამედროვე მსახიობია, თუმცა თუ მისი შეყვარება აქამდე ვერ მოახერხეთ, ეს ფილმი ამაშიც დაგეხმარებათ.

9. ფილმში ნაცნობ სახეებთან ერთად, ახალი და სახასიათო პერსონაჟები ჩნდებიან

გაიგებთ, როგორ გაიცნო კრუელამ ანიტა, ამავდროულად კი სხვა ისეთი აქამდე უცნობი გმირებიც, როგორებიც, მაგალითად, არტია.

10. არა, კრუელა ჯოკერი არ არის

კრუელას გამოსვლამდე ბევრი ვარაუდობდა, რომ ემა სტოუნის პერსონაჟი ხოაკინ ფენიქსის ჯოკერის მსგავსი იქნებოდა, თუმცა რეალური შედეგი ასეთი სულაც არ აღმოჩნდა და დისნეის ახალი ფილმი მაინცდამაინც რამეს თუ უნდა შევადაროთ, ეს უფრო ეშმაკს აცვია პრადაა.

მოკლედ, მრავალი კრიტიკოსისა და მაყურებლის შეფასებით, კრუელა დისნეის საუკეთესო თუ არა, ერთი-ერთი საუკეთესო ფილმი ნამდვილადაა და არც თქვენ უნდა გამოტოვოთ მისი ხილვის შესაძლებლობა.