მთელ მსოფლიოში კინოთეატრები ნელ-ნელა სრულად იხსნება და უკვე გამოჩნდა ის ახალი ფილმებიც, რომლებმაც მაყურებელი კინოში დააბრუნა და დიდ ეკრანზე ნანახი კინოპრემიერების ტრადიციული ხიბლი შეახსენა.

აშშ-ში დიდი ხნის ლოდინის შემდეგ გამოვიდა Cruella (კრუელა) და A Quiet Place 2 (ჩუმი ადგილი 2) და ორივე ფილმმა სულ რამდენიმე დღეში საოცარ წარმატებას მიაღწია.

ჯონ კრანისკის ბოლო წლების ერთ-ერთი საუკეთესო საშინელებათა ჟანრის ფილმის ჩუმი ადგილი მეორე ნაწილმა პანდემიის პერიოდის რეკორდი მოხსნა და პრემიერიდან სამ დღეში $48 მილიონის შემოსავლები დააგროვა.

დისნეის საკულტო ანიმაციის პერსონაჟის შესახებ გადაღებული დამოუკიდებელი ფილმი კრუელაც კინოგაქირავებაში ასევე ძალიან წარმატებული გამოდგა, მიუხედავად იმისა, რომ მისი პრემიერა პარალელურად ონლაინ შედგა სტრიმინგ სერვისზე Disney+: შემოსავლებმა უკვე გადააჭარბა $27 მილიონს.

აღსანიშნავია, რომ ეს მხოლოდ აშშ-ის 3 726 კინოთეატრიდან მიღებული შემოსავლებია და მსოფლიო მასშტაბით ჯერ არ დათვლილა სტატისტიკა, თანაც ზოგიერთ ქვეყანაში აწი უნდა შედგეს პრემიერა.

ემა სტოუნი ფილმში კრუელა.

ფოტო: Disney

ემილი ბლანტი ფილმში ჩუმი ადგილი 2.

ფოტო: Paramount

გასათვალისწინებელია ისიც, რომ ფინანსურ წარმატებასთან ერთად ორივე კინოსურათმა როგორც მაყურებლების დიდი ნაწილის, ასევე კრიტიკოსების დადებითი შეფასებებიც დაიმსახურა.

ემა სტოუნი კრუელას როლში — ნახეთ დისნეის ფილმის პირველი ტრეილერი

გაიქეცი! — A Quiet Place 2-ის ფინალური ტრეილერი სუნთქვას შეგიკრავთ

საქართველოს კინოთეატრებში როგორც ჩუმი ადგილის მეორე ფილმის, ისე კრუელას პრემიერა 3 ივნისს შედგება და ქართველ მაყურებელსაც ექნება შესაძლებლობა, დიდ ეკრანზე იხილოს ბოლო პერიოდის ყველაზე ხმაურიანი და მნიშვნელოვანი კინოსურათები.