გირჩის ერთ-ერთი ლიდერის, ვახტანგ მეგრელიშვილის განცხადებები განხილვის საგანი აქამდეც გამხდარა, თუმცა ახლა ის უკვე დეპუტატია და პასუხისმგებლობაც მეტი უნდა იყოს. ამას ემატება ისიც, რომ მეგრელიშვილი ამჟამად განათლების კომიტეტის წევრია.

რამდენიმე დღის წინ ტელეკომპანია ფორმულამ გადაცემა "ჩათის" ანონსი გაავრცელა, სადაც მეგრელიშვილი ბავშვთა უფლებებზე საუბრობს. მის განცხადებებს არაერთი გამოხმაურება მოჰყვა. უკვე დღეს, 30 მაისს გადაცემა ეთერში გავიდა, სადაც სრული ჩანაწერის ნახვა იყო შესაძლებელი.

On.ge გთავაზობთ მოკლე მიმოხილვას, რა თქვა ვახტანგ მეგრელიშვილმა ბავშვთა უფლებებზე.

დეპუტატმა თავდაპირველად ბავშვის უფლებათა კოდექსზე დაიწყო საუბარი და თქვა, რომ ეს კანონი საშიშია და არის იდეოლოგია იმის შესახებ, როგორ შეიძლება სახელმწიფო ჩაერიოს ოჯახების საქმეში. მისივე თქმით, "ბავშვებს უფლებები არ აქვთ".

"როგორ შეიძლება იმ მოტივით, რომ ბავშვები არიან დასაცავები, ბავშვები დაიცვან საკუთარი მშობლებისგან. პრობლემური მშობლები, ბუნებრივია, არსებობენ, მაგრამ რასაც თავად თქვენ კითხულობთ, ბავშვთა უფლებები რატომ არ ვიციო, ჩემი აზრით, რაც უფრო გვიან გვეცოდინება ეგ, მით უფრო გვიან მოგვეწამლება ცნობიერება", — უთხრა მან გადაცემის წამყვან თინეიჯერს.

მისი თქმით, ის ამ კოდექსის გასაუქმებლად ყველაფერს გააკეთებს.

ამასთან, მეგრელიშვილი მიიჩნევს, რომ "ბავშვებზე ვძალადობთ მასიურად საზოგადოებაში ჩვენი წესრიგის მეშვეობით" და მისი აზრით, მათ შორისაა საგანმანათლებლო წესრიგიც, რომელიც დღეს ჩამოყალიბებულია ქვეყანაში.

გირჩის ლიდერმა თქვა ისიც, რომ საზოგადოება ძალადობას სხვადასხვაგვარად აფასებს და ეს ფარდობითია.

"მაგალითად, სადღაც შეიძლება ჩვეულებრივი მოვლენა იყოს ტრაკოზე წამორტყმა ბავშვისთვის და სადღაც, რომელიმე საზოგადოებაში ეს ძალადობად ითვლებოდეს. ამიტომ, ჩემი აზრით, ჩვენს საზოგადოებაში, სადაც არც სასამართლო გაგვაჩნია და საერთოდ არც ადგილი, რომელსაც ჩვენ ვენდობოდით... პოლიციელის შეშვება ოჯახში იმის გასარკვევად, როგორ ექცევიან მშობლები საკუთარ შვილებს და ეს შემთხვევით ხომ არ არის ძალადობა, ჩვენნაირ საზოგადოებაში ფიზიკურად არ შეიძლება, საშიშია, სახიფათოა ამის გაკეთება. პოლიციელი დღეს ჩემთვის ყველაზე არასანდო ადამიანია იმ სამართალდამცავი სისტემის არსებობის პირობებში, რომელშიც ჩვენ ვცხოვრობთ. სოციალური მუშაკს პოლიციური ფუნქციები აქვს, რაღაც მოფერებითი სახელი ჰქვია — "სოციალური მუშაკი", სინამდვილეში, ის პოლიციელია. მის ბრძანებას თუ არ დაემორჩილებიან, მოვა პოლიციელი და უნდა გვესმოდეს ეს ბავშვებსაც და დიდებსაც", — ამბობს მეგრელიშვილი.

მისივე თქმით, რა ღირებულებებითაც ვცხოვრობთ, მაგალითად, რაჭაში, ქვემო ქართლში და ა.შ. იმ ღირებულებების მატარებელი წესრიგის დამცველებია გარშემო.

"მე თუ ვხედავ, რომ მეორე მეზობელ ოჯახში ბავშვს სცემენ, ჩემი გადმოსახედიდან შეიძლება ეს ვერ მოვითმინო და სხვის კერძო საკუთრებაში შევვარდე, მაგრამ იმ საზოგადოებაში, იმ თემში თუ ზოგადად მიღებულია ბავშვების მიტყეპა ტრაკოზე, ჩემი საქმე არ არის და შეიძლება იქედან გამომაგდონ, გესმით? მე არ მგონია, რომ ჩვენ გვაქვს უფლება, ეს წესრიგი უნივერსალურად გავავრცელოთ. მე წინააღმდეგი ვარ უნივერსალურობის", — აცხადებს პარლამენტის წევრი.

ძალადობაზე საუბრისას მან თავისი ოჯახის გამოცდილებაზეც ისაუბრა:

"პაპაჩემს ჰქონდა მავთულისგან დაწნული მათრახი, რომლითაც სცემდა სამ ბიჭს [სავარაუდოდ, იგულისხმება შვილები — ავტ.] და მამაჩემი გამოვიდა ძალიან კარგი ადამიანი ჩემი აზრით, წარმატებული მათ შორის ცხოვრებაში.

კითხვაზე, ამ მეთოდით აღზრდამ კარგი შედეგი გამოიღო თუ არა, უპასუხა:

"არასოდეს კანონი არ დაურღვევია იმ ხალხს, ნორმალური, ჩვეულებრივი, რიგითი ადამიანები გაიზარდნენ. რაის ძალადობა. უყვარდათ თავისი მშობლები, ყველაფერი ჰქონდათ კარგად, ბედნიერები იყვნენ".

ვახტანგ მეგრელიშვილს ჰკითხეს ნინოწმინდის პანსიონზეც. მისი თქმით, "პოლიტიკურად და პრაგმატულად" ეკლესიის მხარესაა და "სასწაულია", რომ ამ საკითხში მისი მთავარი მოკავშირე ეკლესიაა.

"იმათ თავიანთი არგუმენტებით ზუსტად იგივე შედეგი უნდათ, რომ პოლიციელი არ შემოუშვან ჩემთან სახლში, რაც მე მინდა. არ მაინტერესებს სახალხო დამცველის ეს ნაწილი. თუ მართლა ძალადობაზეა საუბარი, პროკურატურა უნდა შევიდეს...

როცა ბავშვებზე არის საუბარი, იმ ბავშვებს ჰყავთ პატრონები, რომელიც ვიღაცას მოსწონს, ვიღაცას — არა. მაგრამ იმ ბავშვებზე ვიღაცები ზრუნავენ. იმ ადამიანებთან შეიძლება მისვლა და ამ სკანდალის გარეშე დალაპარაკება. ამ ბავშვების გამო სკანდალის აწევა არ მოსულა. შეიძლება გარკვევა", — თქვა მეგრელიშვილმა.

28 მაისს საქართველოს სახალხო დამცველმა პარლამენტის თავმჯდომარეს, კახა კუჭავას მიმართა და ვახტანგ მეგრელიშვილის მიერ ტელეკომპანია ფორმულას გადაცემის ანონსში ბავშვთა უფლებებისა და არასრულწლოვანთა მიმართ ძალადობის შესახებ გაკეთებული განცხადებების განხილვა მოითხოვა.

ომბუდსმენის განცხადებით, განსაკუთრებით საფრთხის შემცველი, შემაშფოთებელი და დასაგმობია მსგავსი გამოსვლა საქართველოს პარლამენტის წევრისგან, რომელსაც საკუთარი მანდატის ფარგლებში აქვს ვალდებულება, ხელი შეუწყოს ქვეყანაში არაძალადობრივი და ბავშვის საუკეთესო ინტერესებზე მორგებული გარემო შექმნას.