საქართველოს სახალხო დამცველმა პარლამენტის თავმჯდომარეს, კახა კუჭავას მიმართა და გირჩის ერთ-ერთი ლიდერის, ვახტანგ მეგრელიშვილის მიერ ტელეკომპანია ფორმულას გადაცემის ანონსში ბავშვთა უფლებებისა და არასრულწლოვანთა მიმართ ძალადობის შესახებ გაკეთებული განცხადებების განხილვა მოთხოვა. ინფორმაციას ამის შესახებ ომბუდსმენის აპარატი ავრცელებს.

ომბუდსმენის განცხადებით, განსაკუთრებით საფრთხის შემცველი, შემაშფოთებელი და დასაგმობია მგავსი გამოსვლა საქართველოს პარლამენტის წევრისგან, რომელსაც საკუთარი მანდატის ფარგლებში აქვს ვალდებულება, ხელი შეუწყოს ქვეყანაში არაძალადობრივი და ბავშვის საუკეთესო ინტერესებზე მორგებული გარემოს შექმნას.

"ვახტანგ მეგრელიშვილის მოქმედებები ასევე, ეწინააღმდეგება "საქართველოს პარლამენტის წევრის ეთიკის კოდექსით" პარლამენტარისთვის დადგენილ ვალდებულებას, დაიცვას საერთაშორისო და ადგილობრივი კანონმდებლობა, პატივი სცეს ადამიანის საყოველთაოდ აღიარებულ უფლებებსა და თავისუფლებებს, ხელი შეუწყოს ქვეყნის დემოკრატიის გაძლიერებასა და სამართლებრივი სახელმწიფოს ჩამოყალიბებას", — ნათქვამია ოფიციალურ განცხადებაში.

საქართველოს სახალხო დამცველი, ასევე, უსვამს ხაზს, რომ მნიშვნელოვანია, ტელეკომპანია ფორმულას მიერ აღნიშნული გადაცემის ეთერში განთავსებისას, ბავშვთა უფლებების და ბავშვის მიმართ ძალადობის საკითხები გაშუქდეს განსაკუთრებული სიფრთხილით, მგრძნობიარე მიდგომის გამოყენებით და საკითხის შესახებ დაბალანსებულად წარმოჩენილი პოზიციების საფუძველზე. ამასთან, ომბუდსმენის თქმით, აუცილებელია, მაუწყებელმა გადაცემის მიმდინარეობისას დაიცვას გადაცემის მონაწილე არასრულწლოვანთა უფლებები.

27 მაისს ტელეკომპანია ფორმულას გადაცემა ჩათის ანონსი გავიდა, სადაც მიწვეული სტუმარი დეპუტატი, ვახტანგ მეგრელიშვილია. გადაცემის ანონსის თანახმად, მეგრელიშვილი აცხადებს, რომ ბავშვებს "არ აქვთ უფლებები", საუბრობს ბავშვთა მიმართ ოჯახში ძალადობაზე და მაგალითად საკუთარი გამოცდილება მოჰყავს.