ოცნების ხელისუფლების იუსტიციის მინისტრმა, პაატა სალიამ ბრალდებულ იოსებ გორგაძის გარდაცვალებასთან დაკავშირებით ჟურნალისტებს განუცხადა, რომ მან მძიმე დაზიანება თავის არეში სავარაუდოდ, დაცემის შედეგად მიიღო, რომლებიც შემდგომ სასიკვდილო აღმოჩნდა.

"ის მძიმე დაზიანება, რომელიც მან თავის არეში მიიღო, სავარაუდოდ, დაცემის შედეგად, ამას გამოძიება დაადგენს შესაბამისი ექსპერტიზების შედეგად, სწორედ ამ დაცემის შედეგად მიიღო ის დაზიანებები, რომლებიც შემდგომ, სამწუხაროდ, სასიკვდილო აღმოჩნდა. იუსტიციის სამინისტრომ ვიდეომასალა გამოაქვეყნა მხოლოდ იმ მიზნით, რომ საზოგადოებამ ნახოს ის კადრები, რომელიც პენიტენციურ სისტემაში და ასევე "ვივამედში" პაციენტის მიღებისას არის გადაღებული. აშკარად ჩანს, რომ პენიტენციური სისტემის წარმომადგენელთა მხრიდან არანაირ ძალადობას არ ჰქონია ადგილი", — განაცხადა პაატა სალიამ.

მისი თქმით, პენიტენციური დაწესებულების მიერ გავრცელებული კადრებში ჩანს, რომ გამორიცხულია, რომ პაციენტს მრავლობითი დაზიანებები ჰქონოდა, მას ერთადერთი დაზიანება სახეზე ჰქონდა — "შემთხვევით დაარტყა თავი სასწრაფო სამედიცინო მანქანაში არსებულ ნივთს".

"ოჯახის მდგომარეობა მესმის. ისინი მძიმე მდგომარეობაში არიან, თუმცა შეუძლებელია, ვერ დაინახო ის ვიდეომასალა, სადაც გამორიცხულია, რომ პაციენტს მრავლობითი დაზიანებები აღენიშნებოდეს. პაციენტს ერთადერთი დაზიანება სახის არეში ჰქონდა, რომელიც სასწრაფო სამედიცინო დახმარების წარმომადგენლების მიერ არის აღწერილი და დასაბუთებული. გადაყვანისას შემთხვევით დაარტყა თავი სასწრაფო სამედიცინო მანქანაში არსებულ ნივთს და, შესაბამისად, მხოლოდ ეს დაზიანება აღენიშნებოდა სახეზე. დანარჩენი დაზიანებები აღმოჩენილი იყო მხოლოდ კომპიუტერული ტომოგრაფიის ჩატარებისა და გამოკვლევის შემდგომ", — განაცხადა პაატა სალიამ.

ოცნების იუსტიციის მინისტრი გამორიცხავს, თითქოს მასალა დამონტაჟებულია ან პენიტენციური სამსახურის თანამშრომლებმა, ან სხვა პატიმრებმა რაიმე ფორმით ჩაიდინეს ძალადობრივი ქმედება გარდაცვლილი პატიმრის მიმართ.

"დაველოდოთ გამოძიებას. არის ამის ნიშნები, არათუ ნიშნები, ცალსახაა, რომ რადიკალურმა ძალებმა აიტაცეს ეს ფაქტი და ცდილობენ, დღის წესრიგი შექმნან ამასთან დაკავშირებით, თითქოს ციხეებში ძალადობას აქვს ადგილი და ა.შ. ამას საზოგადოება არ დაიჯერებს. ალბათ ხედავთ, რამდენად შეცვლილია ვითარება საქართველოს პენიტენციურ სისტემაში, რომ არანაირ სისტემურ ძალადობას ადგილი არ აქვს. შესაბამისად, ეს ყველაფერი მიმართულია რადიკალური ძალების მიერ, რომ საზოგადოებაში გარკვეულწილად საპროტესტო მუხტი გამოიწვიონ. ნებისმიერ დაინტერესებულ პირს შეუძლია, გაეცნოს ჩვენ მიერ გავრცელებული ინფორმაციას და თავად გამოიტანოს დასკვნები, სადაც, ჩემი აზრით, და ამას შემდგომ ალბათ ექსპერტიზაც დაადგენს, რაიმე ძალადობას ადგილი არ ჰქონია", – განაცხადა პაატა სალიამ.

შეგახსენებთ, რომ მიმდინარე წლის იანვარში, გლდანის მე-8 დაწესებულებიდან კლინიკა "ვივამედში" დაზიანებებით გადაყვანილი 46 წლის პატიმარი, იოსებ გორგაძე გარდაიცვალა.

გარდაცვლილი პატიმრის ადვოკატი აცხადებს, რომ პატიმარი ციხეში სცემეს, მას 30-მდე დაზიანება ჰქონდა თავისა და სახის არეში და შეუძლებელია ეს დაზიანებები წაქცევით მიეღო. ამას გარდა, მისი თქმით, 4 თვეა გამოძიება მიმდინარეობს და ჯერ არავინ დაუკავებიათ.

კლინიკა "ვივამედის" კლინიკური დირექტორის, ზურაბ ჩხაიძის თქმით, იანვარში გლდანის მე-8 დაწესებულებიდან შემოყვანილ პატიმარ იოსებ გორგაძეს მრავლობითი ტრავმები ჰქონდა, მას ყველა საჭირო მკურნალობა ჩაუტარდა, მაგრამ გადარჩენა ვერ მოხერხდა.