ინდოეთმა პაკისტანის წინააღმდეგ საჰაერო დარტყმების სერია დაიწყო. პაკისტანის ხელისუფლება რვა დაღუპულისა და საპასუხო დაბომბვის შესახებ იუწყება. ამის შესახებ BBC წერს.

"ინდოეთის შეიარაღებულმა ძალებმა ოპერაცია "სინდური" დაიწყეს პაკისტანსა და პაკისტანის მიერ ოკუპირებულ ჯამუსა და ქაშმირში ტერორისტული ინფრასტრუქტურის დაბომბვით, საიდანაც ინდოეთის წინააღმდეგ ტერორისტული თავდასხმები იგეგმებოდა და ხორციელდებოდა", — აცხადებს ინდოეთის არმია.

ინდოეთის ოფიციალური პირების თქმით, სარაკეტო დარტყმები მებრძოლებთან დაკავშირებულ ცხრა სამიზნეს მოხვდა, თუმცა პაკისტანის ოფიციალური პირები ამას უარყოფენ.

"ჩვენი ქმედებები იყო მიზანმიმართული, გაზომილი და არ გამოიწვევდა ესკალაციას. პაკისტანის არცერთ სამხედრო ობიექტზე არ ყოფილა დარტყმა. ინდოეთმა მნიშვნელოვანი თავშეკავება გამოიჩინა სამიზნეების და მათთან ბრძოლის მეთოდების არჩევისას", — განაცხადა ინდოეთმა.

Reuters-ის ცნობით, ინდოეთის სამხედრო წრეებში ანონიმურმა წყარომ განაცხადა, რომ სარაკეტო დარტყმები ისლამისტური დაჯგუფებების ბაზებზე განხორციელდა.

პაკისტანის არმიის განცხადებით, დარტყმები მშვიდობიან მოსახლეობაზე და არა ტერორისტებზე განხორციელდა.

პაკისტანის პრესსამსახური ირწმუნება, რომ ინდოეთის მიერ განხორციელებული დარტყმების შედეგად 8 ადამიანი დაიღუპა, 35 დაიჭრა, ორი კი დაკარგულად ითვლება. მანამდე, პაკისტანის არმიის წარმომადგენელმა აჰმედ შარიფმა BBC-ს განუცხადა, რომ დაღუპულებს შორის ორი ბავშვია.

შარიფის თქმით, ერთ-ერთი დარტყმა მეჩეთს მოხვდა.

პაკისტანის პრემიერმინისტრმა შაჰბაზ შარიფმა ინდოეთს უპასუხოს.

"ცბიერმა მტერმა პაკისტანის ხუთ ადგილას საზიზღარი თავდასხმა განახორციელა. პაკისტანს აქვს სრული უფლება, სათანადო პასუხი გასცეს და ეს სათანადო პასუხი უკვე გაცემულია", — განაცხადა პრემიერმინისტრმა.

ოთხშაბათს საღამოს, პაკისტანის არმიის პრესსამსახურმა განმარტა, რომ ინდოეთმა ექვს ლოკაციაზე სხვადასხვა ტიპის იარაღით 24 ცალკეული დარტყმა განახორციელა.

პაკისტანის სამხედრო წარმომადგენელმა განაცხადა, რომ ისლამაბადი "უპასუხებს ამ ქმედებას თავის დროსა და ადგილას".

"ჩვენი საჰაერო ძალების ყველა გამანადგურებელი აფრინდა. ეს არის სამარცხვინო და ლაჩრული თავდასხმა, რომელიც ინდოეთის საჰაერო სივრციდან განხორციელდა", — თქვა მან.

ინდური მხრიდან გავრცელებული ინფორმაციით, პაკისტანის არმიამ ქაშმირში გამყოფ ხაზზე საარტილერიო ცეცხლი გახსნა.

ოთხშაბათს საღამოს, პაკისტანის არმიის წარმომადგენელმა განაცხადა, რომ პაკისტანმა ჩამოაგდო ხუთი ინდური სამხედრო თვითმფრინავი, მათ შორის სამი ფრანგული რაფალის გამანადგურებელი და ორი საბჭოთა-რუსული თვითმფრინავი, ერთი "სუ-30მკი" და ერთი "მიგ-29". ინდოეთის მხრიდან ჯერ არც დადასტურება და არც უარყოფა არ არსებობს.

გარდა ამისა, პაკისტანის არმია აცხადებს, რომ ერთ-ერთი ინდური ბრიგადის შტაბ-ბინა გაანადგურა.

პაკისტანმა გაეროს უშიშროების საბჭოს აცნობა, რომ იტოვებს უფლებას, უპასუხოს ინდოეთის "აშკარა აგრესიას".

ინდოეთის არმიის პრესსამსახური აცხადებს, რომ ინდოეთის მხრიდან სამი ადამიანი დაიღუპა. ამის შესახებ მან BBC-ს ოთხშაბათს დილით განუცხადა.

ინდოეთის ხელისუფლებამ კონტროლის ხაზის გასწვრივ მდებარე ყველა საგანმანათლებლო დაწესებულება დახურა. პაკისტანმა ასევე დახურა სკოლები დედაქალაქ ისლამაბადში (რომელიც კონტროლის ხაზთან ახლოს მდებარეობს) და სხვა სასაზღვრო რაიონებში.

ინდური მედიის ცნობით, ოთხშაბათს დილით, ინდოეთის თავდაცვის მინისტრმა რაჯნატ სინგჰმა პაკისტანზე განხორციელებული დარტყმები სახმელეთო ჯარების, საჰაერო ძალებისა და საზღვაო ძალების მეთაურებთან განიხილა.

ბოლო დღეებში ორი ქვეყნის საზღვარზე სროლები მოხდა. არსებობს ვარაუდები, რომ ინდოეთი პაკისტანის წინააღმდეგ სამხედრო დარტყმებით საპასუხო ნაბიჯს გადადგამს, როგორც ეს 2019 და 2016 წლებში მებრძოლების თავდასხმების შემდეგ გააკეთა.