30 აპრილს, ე.წ. ბორჯომის ბაზრის ტერიტორიაზე ხანძარი გაჩნდა. ხანძრის შედეგად 15 ათასამდე კვადრატული მეტრია დამწვარი. ხანძრის გამომწვევი მიზეზები ჯერჯერობით უცნობია. ხანძრისგან დაკვამლიანება იმდენად ძლიერი იყო, რომ ტერიტორიის მიმდებარე კლინიკების ნაწილიდან პაციენტების ევაკუაცია გახდა საჭირო.

ვის ეკუთვნის დამწვარი ტერიტორია?

commersant.ge-ის ინფორმაციით, ვაგზლის ინფრასტრუქტურა 8 200 კვადრატული მეტრის ფართობით წარმოადგენს "საქართველოს რკინიგზის" საკუთრებას, რომელიც კომპანიას 49 წლიანი იჯარით (2006 წლიდან) გაცემული აქვს "თბილისი ცენტრალზე". თავის მხრივ, "თბილისი ცენტრალს" უძრავი ქონების ნაწილი გაცემული აქვს იჯარით კომპანია "ბაქანზე", რომელსაც ეს ქონება წვრილ მოვაჭრეებზე აქვს იჯარით გაცემული. ბიზნეს-რეესტრის ინფორმაციით, "ბაქანის" დირექტორი და 35%-იანი წილის მფლობელი თორნიკე წერეთელია.

იყო თუ არა დაზღვეული ტერიტორია?

შპს "ბაქანის" ადმინისტრაციის მენეჯერი ზაქრო ნოზაძე "კომერსანტთან" აცხადებს, რომ ბორჯომის ბაზრის ტერიტორიაზე არც ერთი მონაკვეთი დაზღვეული არ ყოფილა. მისი განმარტებით, დაზღვევას ვადა გაუვიდა. თავდაპირველად სადაზღვევო კომპანიებმა უარი განაცხადეს, თუმცა ახლა მიმდინარეობდა შენობა-ნაგებობის დასაზღვევად საჭირო პროცედურები. კერძოდ, ერთ-ერთ სადაზღვევო კომპანიაში გაგზავნილი იყო საბუთები.

"სახელმწიფოს მხრიდან როდესაც იყო მოთხოვნა, რომ დაზღვეული ყოფილიყო, მაშინ დავაზღვიეთ ბაზარი მთლიანად. თუ არ ვცდები ან წელს, ან შარშან დაზღვევას გაუვიდა ვადა. ჩვენ ვაპირებდით დაზღვევას. თითქმის ყველა სადაზღვევო კომპანიამ უარი გვითხრა. შემდეგ მიმდინარეობდა მოლაპარაკება ერთ-ერთ კომპანიასთან და შესაბამისად გავამზადეთ საბუთები. იყო პროცესში. ასე, რომ დაზღვეული ამ ეტაპზე არ ყოფილა არც ერთი მონაკვეთი. ოფიციალური დაზღვევა არ გვაქვს. ისე შეტანილი იყო საბუთები სადაზღვევო კომპანიაში და მზადდებოდა," — განაცხადა შპს "ბაქანის" ადმინისტრაციის მენეჯერმა კომერსანტთან საუბრისას.

"ბაქანის" ადმინისტრაციის მენეჯერმა განაცხადა, რომ კომპანიის ზარალი მინიმუმ 5 მილიონი ლარია. მისივე თქმით, ტერიტორიაზე არსებული შენობა-ნაგებობა და მოვაჭრეების პროდუქტები, ასევე საწყობების სრულად დამწვარია.

"ჩვენი ფირმის ზარალი 5 მილიონი ლარია. მე არ მაქვს მოვაჭრეებზე ლაპარაკი. მარტო ჩვენზე გეუბნებით, რომ მინიმუმ 5 მლნ. ლარია ზარალი. სრულად არის განადგურებული. არაფერი არ არის გადარჩენილი. პირადი ნივთები, ოფისის სარგებლობა, თუ კი რამე შედიოდა კომპანიის განკარგულებაში ყველაფერი დამწვარია. პლუს ამას მოვაჭრეების ყველაფერი განადგურებულია. მათ შორის საწყობებიც," — აცხადებს შპს "ბაქანის" ადმინისტრაციის მენეჯერი.

"ბაქანის" დირექტორი დაზარალებულებთან მივიდა:

"ბაქანის" დირექტორი და 35%-იანი წილის მფლობელი თორნიკე წერეთელი დღეს ხანძრის ტერიტორიაზე დაზარალებულებთან მივიდა. ტვ პირველთან საუბრისას მან განაცხადა, რომ ჯერ არანაირი პასუხი არ აქვს.

"ვცდილობ, რომ რაღაცა დარეგულირდეს და ერთი დღე არის გასული. პასუხი არ მაქვს არაფერზე — ვერაფერზე გაგცემთ პასუხს, რადგან პასუხი არ არსებობს ჯერჯერობით. სანამ გამოძიება არ დასრულდება, მე რა პასუხი გითხრათ? მოვატყუო ვინმე? — განაცხადა წერეთელმა (სტილი დაცულია).

გარდა დამწვარი პროდუქციისა, ტვ პირველის ცნობით, სადგურის ბაზრობის მოვაჭრეების ნაწილი ეჭვობს, რომ მათი ის პროდუქცია, რომელიც დაწვას გადაურჩა, ვიღაცამ მოიპარა.

დაზარალებულთა განცხადებით, მათ ეჭვებს უძლიერებთ ის გარემოება, რომ ფეხსაცმლის ყუთების ნაწილი, რომელიც დამწვარი არ არის, ცარიელია.

სადგურის ბაზრობასთან დილიდან ხმაურია. მოვაჭრეები ხელისუფლებისაგან დახმარებას ითხოვენ. თბილისის მერიიდან კი იქ ჯერ არავინ მისულა.

"თბილისი ცენტრალმა" მომხდარ ხანძართან განცხადება გუშინ, 30 აპრილს, გაავრცელა. განცხადებაში ნათქვამია, რომ ბაზრობის ოპერირებასთან დაკავშირებული ყველა იურიდიული, ტექნიკური და სავალდებულო რეგულაციების დაცვა ქვეიჯარის ხელშეკრულების საფუძველზე წარმოადგენს ბაზრობის უშუალო ოპერატორის (შპს ბაქანი) პასუხისმგებლობას.

"მიმდინარე წლის 30 აპრილს, დაახლოებით დილის 6 საათზე ვაგზლის მოედნის მიმდებარედ. ე.ნ ბორჯომის ვაგზლის ტერიტორიაზე არსებულ ბაზრობაზე გაჩნდა ხანძარი, რის შედეგადაც სრულად დაიწვა დაახლოებით I2 000 მ2 სავაჭრო და სასაწყობო სივრცე. აღნიშნული ტერიტორია 49 წლიანი გრძელვადიანი იჯარით აღებული აქვს ს.ს თბილისი ცენტრალს საქართველოს რკინიგზისგან. არსებული საიჯარო ხელშეკრულების ქვეშ, ამ ტერიტორიაზე 2021 წლიდან ბაზრობის მოწყობას და ფუნქციონირებას ქვეიჯარის ხელშეკრულების საფუძველზე ახორციელებს შპს ბაქანი.

ბაზრობის ოპერირებასთან დაკავშირებული ყველა იურიდიული, ტექნიკური და სავალდებულო რეგულაციების დაცვა ქვეიჯარის ხელშეკრულების საფუძველზე წარმოადგენს ბაზრობის უშუალო ოპერატორის პასუხისმგებლობას.

ბაზრობის სპეციფიკის გათვალისწინებით. შპს ბაქანი უზრუნველყოფდა ადგილზე საქართველოს კანონმდებლობით გათვალისწინებული სახანძრო და სხვა უსაფრთხოების ნორმების დაცვას. ხანძარს მსხვერპლი არ მოჰყოლია. სრული ზარალის შეფასება და ხანძრის გამომწვევი მიზეზების დადგენა მოხდება საგამოძიებო ღონისძიებების დასრულების და შესაბამისი მოკვლევის შემდეგ", — ნათქვამია კომპანიის განცხადებაში.

შეგახსენებთ, რომ თბილისში, ვაგზლის ბაზრობის ტერიტორიაზე ხანძარი 30 აპრილს, დაახლოებით დილის 6 საათზე გაჩნდა. დამწვარია სასაწყობე ფართები, სადაც განთავსებული იყო მეორეული ტანსაცმელი, ხილ-ბოსტნეული და სხვადასხვა სახის პროდუქტი.