ჯენიფერ ენისტონმა Friends-ში მიწვეულ ფავორიტ მსახიობად ბრედ პიტი დაასახელა

სერიალის Friends სპეციალური ეპიზოდის გამოსვლამდე, სულ რამდენიმე დღე დარჩა. გულშემატკივრები ამ პერიოდის განმავლობაში გათამამებულები იყვნენ ახალი ინტერვიუებით, ფოტოებით და საინტერესო სიახლეებით.

რა თქმა უნდა, მსახიობებს უამრავ კითხვაზე უწევთ პასუხის გაცემა, მაგრამ ერთ-ერთი ყველაზე დასამახსოვრებელი პასუხის ავტორი ჯენიფერ ენისტონი აღმოჩნდა. Access Hollywood-თან ინტერვიუში ჟურნალისტმა მას ჰკითხა, თუ ვინ იყო მისი საყვარელი ცნობილი მსახიობი, რომელსაც სერიალში ეპიზოდური როლი ჰქონდა. რამდენიმე ჰოლივუდის ვარსკვლავის ჩამოთვლის შემდეგ, ჯენიფერ ენისტონმა ერთი მნიშვნელოვანი სახელი ახსენა. მისი თქმით ბრედ პიტი ერთ-ერთი ყველაზე საყვარელი სტუმარი იყო, ვინც მეგობრებს თავიან ბინაში მიუღიათ.

"მისტერ პიტი არაჩვეულებრივი იყო", — თქვა ჯენიფერმა. მას ლიზა კუდროუც დაეთანხმა. კორტნი კოქს კი სახეზე შეეტყო, რომ საუკეთესო მეგობრის პასუხი არ ესიამოვნა.

ბრედ პიტი, როსის ყოფილი კლასელის როლს ასრულებდა, რომელსაც ჯენიფერ ენისტონის პერსონაჟი რეიჩელი საშინლად ეზიზღებოდა, რადგან ბავშვობაში მისგან ბულინგის მსხვერპლი იყო. პიტმა ამ როლისთვის ემის ნომინაციაც კი დაიმსახურა.

ერთი შეხედვით უწყინარმა კომენტარმა დიდი რეაქცია გამოიწვია. თუკი 90-იანებში ახალ ამბებს ყურს არ ადევნებდით, შეგახსენებთ, რომ ჯენიფერ ენისტონი და ბრედ პიტი იმ პერიოდში ცოლ-ქმარი იყვნენ და 2005 წელს სკანდალურად დაშორდნენ ერთმანეთს.

ბრედ პიტი და ჯენიფერ ენისტონი

ფოტო: Getty Images

წყვილის გულშემატკივრებს ეს დაშორება ჯერ კიდევ კარგად ახსოვთ, ამიტომ მსგავსი პასუხის მოსმენა ძალიან სასიამოვნოა. მათ ნაწილს კიდევ აქვს იმედი, რომ მსახიობები მოახერხებენ ძველი ურთიერთობის აღდგენას.

წყვილის განქორწინების შემდგე, უკვე წლები გავიდა და აშკარაა, რომ მათ შეძლეს მეგობრული ურთიერთობის განახლება. 2020 წლის კინომსახიობთა გილდიის 26-ე დაჯილდოვებაზე ბრედ პიტსა და ჯენიფერ ენისტონს ემოციურმა შეხვედრამ ფანებს მათი ურთიერთობის გაგრძელების იმედი უფრო გაუღვივა.

თუმცა როგორც ჯენიფერ ენისტონთან დაახლოებული პირი ამბობს: "ჯენიფერი არ ფიქრობს, რომ ბრეტ პიტთან რაიმე სახის რომანტიკული ურთიერთობა ექნება".

ჰოლივუდი ყოველთვის მოულოდნელობით არის სავსე და არავინ არ იცის, რა მოხდება მომავალში. მხოლოდ იმის თქმა შეგვიძლია, რომ ნამდვილად კარგი ამბავია, თუკი წყვილმა უთანხმოება წარსულში დატოვა.