ამბავი, რაც 2 წლის წინ, ან წელიწადნახევრის წინ არარეალურიც კი ჩანდა, დღეს რეალობაა. წლების განმავლობაში ამ სიტყვების მოსმენას Friends-ის მაყურებელი მოთმინებით ელოდა: სერიალის დასრულებიდან 17 წლის შემდეგ, სპეციალურ ეპიზოდში, სახელად "The One Where They Get Back Together", ისევ ერთად ვიხილავთ დევიდ შვიმერს, მეთიუ ლებლანკს, ჯენიფერ ენისტონს, ლიზა კუდროუს, კორტნი კოქსსა და მეთიუ პერის.

სპეციალური ეპიზოდის გადაღებებზე ჟურნალმა People-მა შეაღწია და მსახიობებისგან ექსკლუზიური კომენტარები და კადრები შემოგვთავაზა.

"ეს ახდენილი ოცნება იყო და ამას ძალიან მალე მივხვდით", — ამბობს დევიდ შვიმერი ინტერვიუსა და ვიდეოს დასაწყისში.

როსის როლის შემსრულებელი ასევე ამბობს, რომ 17 წლის განმავლობაში 6-ვე მსახიობმა ერთმანეთი სულ რამდენჯერმე ნახეს, თუმცა მას აშკარად გამორჩა ჯენიფერ ენისტონის სელფი, რომელშიც ყველანი ერთად არიან:

"ერთ ოთახში ექვსივე ერთად ბოლოს 9 წლის წინ ვიყავით და ახლა. ვიცი, რომ გოგოები ხვდებოდნენ ერთმანეთს და აგრძელებდნენ მეგობრობას, ჩვენც ვნახულობდით ერთმანეთს, მაგრამ ყველანი ერთად არ ვიკრიბებოდით".

შვიმერის ეს სევდიანი სიტყვები სასწრაფოდ გამოასწორა მეთიუ ლებლანკმა:

"უცნაური ისაა, რომ როცა ერთმანეთს ვხვდებით, ვერ ვგრძნობთ, რომ დროა გასული. ალბათ ყველას აქვს ცხოვრებაში ასეთი ურთიერთობები, როცა მეგობრები დიდი ხნის შემდეგ ერთმანეთს ხვდებიან და ურთიერთობას სწორედ იქედან აგრძელებენ, სადაც ბოლოს დატოვეს. და როცა ამ ადამიანებს ესაუბრები, გულწრფელი და ბედნიერი ხარ".

ფოტო: MARK SELIGER

"10-წლიანი მოგონებები ერთდროულად დამატყდა თავს", — ამბობს მონიკას როლის შემსრულებელი, კორტნი კოქსი მსახიობებთან შეხვედრაზე.

იმასაც აღნიშნავენ, რომ მეგობრობა არასდროს შეუწყვეტიათ.

"ეს ჩემს ცხოვრებაში ერთ-ერთი საუკეთესო სამსახური იყო. კი, მეგობრების სახით საოცარი შოუ შედგა, მაგრამ ის ურთიერთობები, რაც ამ სერიალმა დამიტოვა, უბრალოდ შეუფასებელია. მას სიტყვებით ვერ აღვწერ", — ამბობს ჯენიფერ ენისტონი.

ფოტო: MARK SELIGER

ჯენიფერმა ასევე გაამჟღავნა, რომ გადასაღები მოედნიდან კაბა მოიპარა, რომელიც მონიკას პერსონაჟს ეცვა და მას დღემდე ატარებს.

ფოტო: People

მართალია ფიბის როლის შემსრულებელი ლიზა კუდროუ დიდი ხანი ამტკიცებდა, რომ გადასაღები მოედნიდან არაფერი მოუპარავს, მაგრამ საბოლოოდ აღიარა, რომ ფიბის ბეჭდები ხელს გააყოლა და მათ დღემდე ატარებს.

როგორი ურთიერთობა აქვთ ერთმანეთთან მსახიობებს? მეგობრები მათ მრავალწლიან კავშირს იმ სიახლოვეს ადარებენ, რომელიც მხოლოდ ოჯახის წევრთან გექნება. "ისინი ჩემთვის დებივით არიან, რადგან და არასდროს მყოლია", — ამბობს ჯენიფერი.

ინტერვიუში ლიზა კუდროუ აღნიშნავს, რომ მას ჯენიფერთან და კორტნისთან ისეთი ხშირი კონტაქტი არ აქვს, რამდენიც რეიჩელისა და მონიკას როლის შემსრულებლებს, თუმცა მათთან კავშირს და სიახლოვეს ეს საფრთხეს არ უქმნის.

ფოტო: MARK SELIGER

27 მაისს მეგობრები ჩვენთვის იკრიბებიან, თუმცა ისინი პერსონაჟების როლებს არ მოირგებენ. სპეციალური ეპიზოდი ვარსკვლავებით და შოუს სხვა მსახიობებით იქნება დახუნძლული.