ბელარუსში ამტკიცებენ, რომ თვითმფრინავში ასაფეთქებელი ნივთიერების შესახებ ინფორმაცია ელექტრონული ფოსტით მიიღეს, რომელიც ჰამასის სახელით მიიღეს.

ჰამასი პალესტინური დაჯგუფებაა, რომელიც 2007 წლიდან ღაზის სექტორს აკონტროლებს. მას ისრაელში, აშშ-სა და ევროკავშირში ტერორისტულ ორგანიზაციად აღიარებენ. ორგანიზაცია ბრალდებებს უარყოფს. როგორც დაჯგუფების სპიკერმა, ფავზი ბაჰრუმამ თქვა, ეს მათი მეთოდები არაა და მხოლოდ ჰამასის დემონიზაციისკენაა მიმართული.

წერილის შესახებ განაცხადა ბელარუსის ტრანსპორტისა და კომუნიკაციის სამინისტროს ავიაციის დეპარტამენტის დირექტორმა, არტემ სიკორსკიმ. როგორც მან თქვა, მინსკის საერთაშორისო აეროპორტმა წერილი ინგლისურ ენაზე მიიღო.

"ჩვენ, ჰამასის მებრძოლები, მოვითხოვთ, რომ ისრაელმა ღაზის სექტორში ცეცხლი შეწყვიტოს. ჩვენ მოვითხოვთ, რომ ევროკავშირმა უარი თქვას ამ ომში ისრაელის მხარდაჭერაზე. ცნობილია, რომ Delfi Economic Forum-ის მონაწილეები უკან FR4978-ით ბრუნდებიან. ამ თვითმფრინავში ბომბია. თუ ჩვენს მოთხოვნებს არ შეასრულებთ, ბომბი 23 მაისს ვილნიუსის თავზე აფეთქდება", — წაიკითხა სიკორსკიმ ტექსტი.

სიკორსკი ამბობს, რომ მუქარის შესახებ ბელარუსმა დისპეტჩერებმა Ryanair-ის თვითმფრინავის ეკიპაჟს შეახსენეს, რის შემდეგაც მატ მინსკში დაშვების გადაწყვეტილება მიიღეს. მისივე განცხადებით, ეკიპაჟზე რაიმე სახის ზეწოლა არ ყოფილა.

ღაზის სექტორში ცეცხლი მინსკში თვითმფრინავის დაშვებამდე სამი დღით ადრე, 20 მაისს შეწყდა. მაშინ ჰამასმა და ისრაელის ხელისუფლებამ შეთანხმებას მიაღწიეს.

23 მაისს ათენიდან ვილნიუსისკენ მიმავალი Ryanair-ის თვითმფრინავი მინსკის აეროპორტში საგანგებოდ დაეშვა. ეს მას შემდეგ მოხდა, რაც გავრცელდა ინფორმაცია, რომ ბორტზე ასაფეთქებელი. საბოლოოდ შეტყობინება ცრუ აღმოჩნდა. ბელარუსის თავზე კი თვითმფრინავს სამხედრო გამანადგურებელი MiG-29 დაყვებოდა.

მგზავრებს შორის ოპოზიციური ტელეგრამარხის Nexta-ს ხელმძღვანელი, რომან პროტასევიჩი, რომლის წინააღმდეგაც ბელარუსში სისხლის სამართლის საქმეა აღძრული. პროტასევიჩი და მისი შეყვარებული, რუსეთის მოქალაქე სოფია საპეგა აეროპორტში დააკავეს. შვიდსაათიანი დაკავების შემდეგ კი ლაინერი ვილნიუსში ჩავიდა.

ევროპული ქვეყნების დიდმა ნაწილმა თვითმფრინავის დაშვება სწორედ პროტასევიჩის დაკავებას დაუკავშირა. ლიეტუვამ თავის მოქალაქეებს მოუწოდა ბელარუსი დატოვო და განაცხადა, რომ ბელარუსის საჰაერო სივრციდან რეისების მიღებასა და გაგზავნას წყვეტს. ბელარუსთან საჰაერო მიმოსვლის შეწყვეტას გეგმავს უკრაინა.