ქართული ოცნების თავმჯდომარის, ირაკლი კობახიძის განცხადებით, ევროპულმა საქართველომ თვითგანადგურების რეჟიმი ჩართო და ეს წარმატებითი მიიყვანა. მისი თქმით, პარტიამ "ბოლომდე გაინადგურა თავი". ამის შესახებ მან რუსთავი 2-ის რამის კურიერში ისაუბრა.

"ევროპულმა საქართველომ ჩართო თვითგანადგურების რეჟიმი, როდესაც მან საბოტაჟი გამოუცხადა საქართველოს პარლამენტს, არჩევნებს არ ცნობდა ლეგიტიმურად და ეს რეჟიმი წარმატებით მიიყვანეს, ბოლომდე გაინადგურეს თავი. რაც არის კარგი ქართული დემოკრატიის განვითარებისთვის იმიტომ, რომ ევროპული საქართველოც არის — იყო, უკვე წარსულში შეგვიძლია ვისაუბროთ — დაახლოებით იგივე, რაც არის ნაცმოძრაობა თავისი მძიმე წარსულით, აწმყოთი და ასეთივე პოტენციური მძიმე მომავლით", — თქვა მან.

ევროპულმა საქართველომ დღეს, 18 მაისს განაცხადა, რომ არ აპირებს საპარლამენტო საქმიანობაში ჩართვას, ტარიელ ნაკაიძემ კი პარლამენტში შესვლა გადაწყვიტა.

აღსანიშნავია, რომ 2020 წლის არჩევნების შედეგად, ევროპულმა საქართველომ სულ 5 მანდატი მიიღო. მართალია, პარტია ოფიციალურად პარლამენტში არ შედის, მაგრამ იმ ადამიანებმა, რომლებიც არჩევნებზე ევროპულ საქართველოს წარმოადგენდნენ, საპარლამენტო საქმიანობაში ჩართვა გადაწყვიტეს. კერძოდ, დავით ბაქრაძემ, შალვა შავგულიძემ, არმაზ ახვლედიანმა და როგორც დღეს გახდა ცნობილი, ტარიელ ნაკაიძემაც. კიდევ ერთი მანდატი კი ელენე ხოშტარიას ეკუთვნის, რომელიც პარლამენტში შესვლას არ აპირებს, თუმცა უკვე დატოვა ევროპული საქართველო და ახალი პოლიტიკური მოძრაობა შექმნა.

ოპოზიციური პარტიების დიდი ნაწილი პარლამენტში შევიდა. განსხვავებული პოზიცია აქვს ლეიბორისტულ პარტიას, ასევე, ამ დროისთვის უცნობია ნაციონალური მოძრაობის საბოლოო გადაწყვეტილება.