ევროპული საქართველო პარლამენტში არ შევა. ეს გადაწყვეტილება პარტიის პოლიტსაბჭოზე მიიღეს, რომელიც ჟურნალისტებს აკაკი ბობოხიძემ გააცნო.

მისი თქმით, ევროპულ საქართველოს ჰქონდა რესურსი, რომ წარმოდგენილი ყოფილიყო პარლამენტში, კერძოდ, ტარიელ ნაკაიძის სახით, რომელმაც ახლა თავად უნდა გადაწყვიტოს, დატოვებს პარტიას თუ პარლამენტის წევრობაზე იტყვის უარს.

"საქართველოს პარლამენტის წევრი, ტარიელ ნაკაიძე არის ევროპული საქართველოს პოლიტსაბჭოს წევრი. ევროპულ საქართველოს ბატონი ტარიელის მეშვეობით შეუძლია წარმოდგენილი იყოს საქართველოს პარლამენტში და წარმოადგენდეს ევროპულ საქართველოს, მაგრამ დღეს პარტიის პოლიტიკურმა საბჭომ მიიღო საბოლოო გადაწყვეტილება — ევროპული საქართველო ამ პარლამენტს არ შეურთდება და არ მიიღებს მონაწილეობას მის მუშაობაში. ბატონი ტარიელი ან დატოვებს ევროპულ საქართველოს, ან დატოვებს პარლამენტს, ეს მისი გადაწყვეტილება იქნება", — თქვა ბობოხიძემ.

აღსანიშნავია, რომ პარლამენტში უკვე შევიდნენ დავით ბაქრაძე, შალვა შავგულიძე და არმაზ ახვლედიანი, რომლებიც 2020 წლის საპარლამენტო არჩევნებში სწორედ ამ პარტიას წარმოადგენდნენ. ევროპულ საქართველოს სულ 5 მანდატი აქვს, საიდანაც სამი უკვე გამოყენებულია, ხოლო ერთი ელენე ხოშტარიას ეკუთვნის, რომელიც პარლამენტში შესვლას არ აპირებს, თუმცა უკვე დატოვა ევროპული საქართველო და ახალი პარტია შექმნა. შესაბამისად, ამ ეტაპისთვის ევროპულ საქართველოს რჩება ერთი, ტარიელ ნაკაიძის მანდატი.

ოპოზიციური პარტიების დიდი ნაწილი პარლამენტში შევიდა. განსხვავებული პოზიცია აქვს ლეიბორისტულ პარტიას, ასევე, ამ დროისთვის უცნობია ნაციონალური მოძრაობის საბოლოო გადაწყვეტილება.

განახლება: ტარიელ ნაკაიძე პარლამენტში შედის. მისი თქმით, პარტიის გადაწყვეტილება პარლამენტში არშესვლასთან დაკავშირებით მისთვის გასაგები და მისაღებია, მაგრამ მნიშვნელოვანია საკანონდებლო ორგანოში წარმოადგინოს რელიგიური და ეთნიკური უმცირესობები და თემები, რომლებიც აქამდე ნაკლებად განიხილებოდა.