2021 წლის პირველ კვარტალში ტელევიზიებს შორის ყველაზე მეტი სარეკლამო შემოსავალი იმედს ჰქონდა — 5,3 მილიონი ლარი. ეს ყველა ტელევიზიის ჯამური შემოსავლის მესამედზე მეტია. აღსანიშნავია ისიც, რომ წინა პერიოდთან შედარებით, იმედის შემოსავლები შემცირებულია. ინფორმაციას კომუნიკაციების კომისია ავრცელებს.

უწყების ცნობით, ამ სამ თვეში, წინა წლის ანალოგიურ პერიოდთან შედარებით, ტელე მაუწყებლების სარეკლამო შემოსავლები 3%-ით გაიზარდა და ჯამში 14,5 მილიონი ლარი შეადგინა, საიდანაც 13,2 მილიონი ლარი პირდაპირ რეკლამასა და სპონსორობაზე მოდის.

კომუნიკაციენის კომისიაში ამბობენ, რომ ჯამური სარეკლამო შემოსავლების ზრდა ჰქონდათ TV პირველს, სილქნეტს, ფორმულას, ასევე POSTV-ს, GDS TV-ის და "რ.ბ.ჯ“-ს ჰქონდათ, ხოლო იმედის, რუსთავი 2-ის, მთავარი არხისა და საზოგადოებრივი მაუწყებლის სარეკლამო შემოსავლებში კლება დაფიქსირდა.

არხების მიხედვით სარეკლამო შემოსავლები ასე გადანაწილდა:

  • იმედი — 5,3 მილიონი ლარი;
  • რუსთავი 2 — 2,0 მილიონი ლარი;
  • მთავარი არხი — 1.9 მილიონი ლარი;
  • TV პირველი — 1,2 მილიონი ლარი;
  • სილქნეტი — 0,8 მილიონი ლარი;
  • ფორმულა — 0,7 მილიონი ლარი;
  • POSTV — 0,7 მილიონი ლარი;
  • GDS TV — 0,6 მილიონი ლარი;
  • რ.ბ.ჯ — 0,2 მილიონი ლარი;
  • საზოგადოებრივი მაუწყებელი — 0,2 მილიონი ლარი;
  • სხვა — 1,0 მილიონი ლარი.

რაც შეეხება რადიო მაუწყებლების სარეკლამო შემოსავლებს, 2021 წლის პირველ კვარტალში წინა წლის ანალოგიურ პერიოდთან შედარებით 24%-ით შემცირდა. რადიოების სარეკლამო შემოსავლებმა ჯამურად 1,4 მილიონი ლარი შეადგინა.

კომუნიკაციების კომისია განმარტავს, რომ სარეკლამო შემოსავლები მოიცავს პირდაპირ რეკლამას, სპონსორობას, პროდუქტის განთავსებას, განცხადებებსა და ტელეშოფინგს.