ინფორმაციის თავისუფლების განვითარების ინსტიტუტი საქართველოს საბჭოთა სოციალისტური რესპუბლიკის უმაღლესი საბჭოს ყოფილი დეპუტატების საკანონმდებლო ინიციატივას ეხმაურება, რომლის თანახმადაც 20-მა ყოფილმა დეპუტატმა საქართველოს პარლამენტს სახელმწიფო კომპენსაციის დანიშვნა მოსთხოვა. IDFI მიიჩნევს, რომ ამ ადამიანებისათვის ფულადი კომპენსაციის გადახდა ვერც ზნეობრივად და ვერც სამართლებრივად გამართლებული ვერ იქნება.

ორგანიზაციის მიერ გავრცელებულ განცხადებაში იმ სამართლებრივ და მორალურ ნორმებზეა საუბარი, რომლებსაც მათი პოზიცია ეფუძნება. კერძოდ,

საქართველოს კანონი “ სახელმწიფო კომპენსაციისა და სახელმწიფო აკადემიური სტიპენდიის შესახებ” სსრ უმაღლესი საბჭოს დეპუტატებისათვის კომპენსაციის დანიშვნის საკითხს არ ითვალისწინებს. კანონი მხოლოდ 1990 წელს არჩეული ყოფილი უზენაესი საბჭოს წევრებისათვის კომპენსაციის მიღების საკითხს განსაზღვრავს.

საქართველოს პარლამენტიდან გამოთხოვილი დოკუმენტაციიდან კი ირკვევა, რომ სსრ უმაღლესი საბჭოს დეპუტატებს არც უხსენებიათ რუსეთის მიერ საქართველოს ოკუპაციის საკითხი და არ დაგმეს საბჭოთა რეჯიმის მიერ ჩადენილი დანაშაულებები.

"საქართველოს სსრ უმაღლესი საბჭოს წევრებს უდიდესი წვლილი მიუძღვით ქვეყნის განვითარებაში. სწორედ მათი შრომის შედეგად შეიქმნა ქვეყნის უდიდესი მატერიალური და სულიერი დოვლათი, ამაღლდა მოსახლეობის კეთილდღეობის დონე", - წერია საკანონმდებლო წინადადების განმარტებით ბარათში.

IDFI-ის განცხადებაში წერია, რომ აღნიშნულ საკითხთან დაკავშირებით უკვე სამი საკომიტეტო მოსმენა გაიმართა. ადამიანის უფლებათა დაცვისა და სამოქალაქო ინტეგრაციის კომიტეტმა წინადადების ავტორთა მოთხოვნა სამართლიანად ცნო და “სახელმწიფო კომპენსაციისა და სახელმწიფო აკადემიური სტიპენდიის შესახებ” კანონში ცვლილებას მხარი დაუჭირა.

საფინანსო-საბიუჯეტო კომიტეტმა წინადადების საკანონმდებლო ინიციატივის სახით ცნობა მიზანშეწონილად მიიჩნია, თუმცა აღნიშნა, რომ წინადადების მხარდაჭერა გავლენას იქონიებს უკვე დასრულების პროცესში მყოფ 2016 წლის სახელმწიფო ბიუჯეტის ხარჯვით ნაწილზე.

რაც შეეხება იურიდიულ საკითხთა კომიტეტს, მისი წევრების აზრით, საქართველოს სსრ უმაღლესი საბჭოს ყოფილი წევრების საქართველოს პარლამენტის წევრებთან გათანაბრება და შესაბამისად აღნიშნული ინიციატივის მხარდაჭერა დაუშვებელია.

IDFI-ის მიერ გავრცელებულ განცხადებაში აღნიშნულია, რომ ვინაიდან საქართველოს კანონმდებლობა ტოტალიტარულ საბჭოთა რეჟიმს გმობს და მათგან დევნილ ადამიანებს პოლიტიკური რეპრესიების მსხვერპლად აღიარებს, დაუშვებელია საბჭოთა რეჟიმის უმაღლესი საბჭოს წევრებისათვის ზემოაღნიშნული კომპენსაციის დანიშვნა.

“ვფიქრობთ, რომ მიუხედავად ინიციატივის ხელმომწერთა ნაწილის უდავო დამსახურებისა საქართველოს კულტურის, მეცნიერებისა თუ სპორტის სფეროების განვითარების კუთხით, ერთპარტიული „არჩევნების“ გზით საბჭოთა საქართველოს უზენაესი საბჭოს წევრობისთვის ფულადი კომპენსაცია ვერც ზნეობრივად და ვერც სამართლებრივად გამართლებული ვერ იქნება“, - წერია განცხადებაში.