მართალია, ჯერ კიდევ გასულ წელს გავრცელდა ინფორმაცია, რომ ფარული ვნების მეორე სეზონის გადაღება იგეგმებოდა, მაგრამ უკვე ტელეკომპანია Telemundo-მაც ოფიციალურად დააანონსა თავისი ცნობილი სატელევიზიო შოუს გაგრძელება.

როგორც სანდო ესპანურენოვანი, ისე ამერიკული მედიის ცნობით, ფარული ვნების ახალი სეზონი 2021 წლის ბოლომდე გამოვა და 2022 წლამდე გაგრძელდება. თუ 2003 წელს გამოსული პირველი სეზონის მიხედვით ვიმსჯელებთ, სერიების ნაკლებობა მაყურებელს ნამდვილად არ შეაწუხებს...

დაახლოებით ცნობილია ახალი სეზონის სცენარიც: სერიალი ძირითადად კვლავ ერთგული მაყურებლისთვის კარგად ნაცნობი ძმების ირგვლივ განვითარდება, ოღონდ ოცი წლის შემდგომ მოვლენებზე მოგვითხრობს და მათ შთამომავლობას, ახალ თაობას გავიცნობთ.

Telemundo იმასაც გვპირდება, რომ უფრო დრამატული, ვნებიანი და ტრაგიკული სანახაობა გველის წინ.

ფოტო: TELEMUNDO

სამწუხაროდ, ჯერჯერობით ოფიციალურად დადასტურებული არ არის, თუ ვის ვიხილავთ ახალ სეზონში ძველი სამსახიობო გუნდიდან და ვინ დაუბრუნდება თავის როლს.

თუმცა, მთავარი მაინც ის არის, რომ 17 წლის შემდეგ ფარული ვნება ეკრანებზე ბრუნდება!