საქართველოს საელჩო ისრაელში მოუწოდებს საქართველოს მოქალაქეებს, დაიცვან უსასფრთხოების ზომები და თავი შეიკავონ ქუჩაში გასვლისგან. ქვეყანაში საგანგებო მდგომარეობაა გამოცხადებული.

"მოიკითხეთ რაკეტსაწინააღმდეგო თავშესაფარი თქვენს საცხოვრებელ ადგილთან ახლოს. არ გახვიდეთ აივანზე და მოერიდეთ ფანჯარასთან ყოფნას", — წერია საელჩოს განცხადებაში.

იერუსალიმზე განხორციელებული სარაკეტო შეტევების შემდეგ ისრაელმა ღაზას სექტორზე ავიაიერიში მიიტანა. საერთაშორისო მედია ისრაელის თავდაცვის სამინისტროზე დაყრდნობით წერს, რომ საპასუხო თავდასხმა ჰამასის მიერ კონტროლირებად ტერიორიაზე განხორციელდა.

The Wall Street Journal ოფიციალურ წყაროებზე დაყრდნობით წერს, რომ ღაზას სექტორში 21 ადამიანი, მათ შორის 8 ბავშვი გარდაიცვალა. ისრაელის თავდაცვის უწყება კი აღნიშნავს, რომ ჰამასის 8 ბოევიკი მოკლეს და ბავშვების გარდაცვალების შესახებ გავრცელებულ ინფორმაციას სწავლობენ.

აღნიშნავს, რომ 2014 წლის შემდეგ ეს პირველი შემთხვევაა, როცა ღაზას სექტორიდან იერუსალიმზე სარაკეტო თავდასხმა განხორციელდა.

რამდენიმე დღეა იერუსალიმში პალესტინელებსა და ისრაელის პოლიციას შორის დაპირისპირებაა. კონფლიქტის მიზეზი გახდა ქალაქის აღმოსავლეთი ნაწილიდან პალესტინელი ოჯახების გამოსახლების საფრთხე. როგორც BBC წერს, ძველ ქალაქში, დამასკოს კარიბჭესთან პალესტინელებმა პოლიციას ქვები დაუშინეს, ხოლო ოფიცრებმა წყლის ჭავლი და რეზინის ტყვიები გამოიყენეს.

დაპირისპირება პარასკევს საღამოს დაიწყო, რა დროსაც პირველ ღამეს 200-ზე მეტი პალესტინელი და 17 ისრაელელი პოლიციელი დაშავდა. შაბათს შეტაკებები განახლდა დამასკოს კარიბჭესთან მას შემდეგ, რაც ათასობით მუსლიმმა ალ-აქსას მეჩეთთან ილოცა. მანამდე ისრაელის პოლიციამ გააჩერა ავტობუსები, რომლებსაც მომლოცველები მეჩეთისკენ გადაჰყავდა და რამდენიმე პალესტინელი დააკავა.

ახლო აღმოსავლეთის მოლაპარაკებებში მონაწილე აშშ, ევროკავშირი, რუსეთი და გაერო შეშფოთებას გამოხატავენ მზარდი ძალადობის გამო. ამასთან, იორდანიამ დაგმო ისრაელის პოლიციის ქმედებები და ხელისუფლების ქმედებებს "ბარბაროსული" უწოდა.