ნაციონალური მოძრაობის თავმჯდომარის, ნიკა მელიას განცხადებით, თვითმართველობის არჩევნებზე ოპოზიციურ პარტიებს შორის კოორდინაციაა საჭირო. მისი თქმით, გამგებლების თანამდებობზე სხვადასხვა პარტიის წარმომადგენლები უნდა დაინიშნონ. მისივე თქმით, თუ კოალიციურ ერთობა შექმნიან საარჩევნო მარათონში ჩაერთვება, წინააღმდეგ შემთხვევაში კი არ აპირებს "იმ კამპანიაში ჩართვას, სადაც კამპანია კამპანიისთვის უნდა აწარმოოს".

"ერთობა არ არის აუცილებელი, რომ რომელიღაცა კანდიდატს ჩაეხუტოს ვიღაცა, მაგრამ კოორდინაცია მჭიდრო... თბილისში მერობის კანდიდატი არის მხოლოდ? 10 მაჟორიტარული ოლქი იქნება მხოლოდ და თუ არ იქნება კოორდინაცია ოპოზიციურ პარტიებს შორის და არ მოხერხდება საერთო მაჟორიტარული კანდიდატების გამოკვეთა, 10-ვე ოლქს მოიგებს ქართული ოცნება. რატომ იცით? მეორე ტური არ არსებობს მაჟორიტარულ ოლქში და თუკი 6, 7, და 8 ოპოზიციური პარტია თავის კანდიდატს წამოაყენებს, შეიძლება 23%-ით მოიგოს ქართულმა ოცნებამ.

მე როგორ ვუყურებ თბილისის არჩევნებს, გეტყვით. მერობის კანდიდატის გარშემო კი არ უნდა მოხდეს გაერთიანება, საკრებულოს თავმჯდომარე უნდა იყოს სხვა პარტიის წარმომადგენელი, ვიცე-მერის სხვა, მთაწმინდის გამგებელი სხვა, გლდანის გამგებელი სხვა... უნდა იყოს ნაკრები და საზოგადოებამ უნდა დაინახოს, რომ მერის გარშემო კი არ არის გაერთიანებული, მერი ერთ-ერთი უნდა იყოს, კოალიცია მოდის", — განაცხადა მან.

ნიკა მელიამ რუსთავის #12 ციხე დღეს, 10 მაისს დატოვა. პროკურატურამ თბილისის საქალაქო სასამართლოს აღკვეთის ღონისძიების გირაოთი შეცვლის შუამდგომლობით 9 მაისს მიმართა. სასამართლომ მოთხოვნა დააკმაყოფილა. მელიას გირაოს თანხა ევროკავშირმა გადაიხადა.