ჯანდაცვის მინისტრის, ეკატერინე ტიკარაძის განცხადებით, პაციენტების სათანადო მომსახურება არა მხოლოდ საავადმყოფოებში თავისუფალი საწოლების, არამედ ექიმების საკმარის რაოდენობაზეა დამოკიდებული.

"მედიის საშუალებით მუდამ არის კითხვები და აპელირება იმაზე, თუ რამდენი საწოლია. კიდევ ერთხელ ვადასტურებ, რომ რამდენი საწოლიც არ უნდა იყოს თავისუფალი, თუ ჩვენ არ გვეყოლება ექიმები, ჩვენ ამ საწოლებს ვერ მოვემსახურებით [...]

თითოეული ექიმის სწავლების გზა მოიცავს 6-7 წელი საუნივერსიტეტო პერიოდის სწავლებას და შემდეგ, 3-4 წელი რეზიდენტურას. აქედან გამომდინარე, ვერანაირ შემჭიდროვებულ ვადებში ჩვენ 12 წელს ვერ ჩავატევდით", — განაცხადა ტიკარაძემ პარლამენტში ვიზიტისას.

ექიმების დეფიციტზე საუბრისას, ჯანდაცვის მინისტრმა, ასევე, განაცხადა, რომ ეს პრობლემა საქართველოში აქამდეც იყო და პანდემიამ კიდევ უფრო გაამწვავა.

"ის, რომ ლიმიტირებული ექიმების რაოდენობა გვაქვს, ეს ყველასთვის ცნობილია. არასდროს საზოგადოებისთვის ეს ფაქტი ჩვენ არ დაგვიმალავს. თუნდაც ის არსებული ექიმების მიგრაცია, რომელსაც ადგილი ჰქონდა საქართველოში პანდემიის დაწყებამდე, გამოწვეული არის სწორედ ექიმების დეფიციტით. ეს არის ყირადსაღები და უნდა გავითვალისწინოთ, რომ პანდემიის შემთხვევაში ეს პრობლემა კიდევ უფრო მწვავედ დგას", — განაცხადა ჯანდაცვის მინისტრმა.

პარლამენტში, მინისტრის საათის ფარგლებში ვიზიტისას, ჯანდაცვის მინისტრმა კორონავირუსის ვაქცინებზეც ისაუბრა და განაცხადა, რომ ამ საკითხზე "უარგუმენტოდ" აკრიტიკებენ.

გაიგეთ მეტი: